Roksta autors: portals lakuga.lv

Preiļu Golvonajā bibliotekā 29. oktobrī nūtiks burnasa aba zīmys vadmolys mieteļa svātki. Burnasu atdarynuojuse tautystārpu meistare Iveta Seimanova. Juo tapšonys stuosts ir pylns najaušeibu i sakriteibu, portalam lakuga.lv atzeist I. Seimanova.

Iveta Seimanova nupat kūpā ar dūmubīdrim nūdybynuojuse bīdreibu “Latgolys etnografiskuo viestnīceiba”, kurys mierkis ir saglobuot i popularizēt nūvoda etnografiskū montuojumu. Ivetys dorbs pi Latgolys tārpu atdarynuošonys aizasuocs jau seņuok, pārņ jei prezentēja divejus Latgolys tārpus – 19. godu symta Vydsmuižys sīvys tārpu i latgaļu sīvītis arheologiskū tārpu, kas datejams ar 10. godu symtu. Jau darynojūt Vydsmuižys sīvys tārpu, kū Iveta poša sauc par Vydsmuižys Annužu, rodusēs dūma, ka tārpam vajag ari “zīmys kuortu”. Nu suoku jei acs matuse iz Preiļu burnasu aba zīmys mieteli nu vadmolys. Tok konsuļtejutēs ar specialistim, dūmu atmatuse, jo mieteļam bejuse vajadzeiga bryunūs vyšku vylna, kuru myusu dīnuos nikur navar dabuot. Par tū Vydsmuižys Annuža tykuse pi Rēzeknis burnasa. Tok bejs lamts atdarynuot ari Preiļu burnasu i sakriteibu rezultatā Iveta dabuojuojuse bryunūs vušku vadmolu.

“Es beju nūlāmuse atdarynuot Vydsmuižys gūda prīškautu. Nagribieju izmontuot myusu dīnuos austu lyna audumu, par tū meklieju senejuoku. Caur Facebook.com atrodu meitini nu Preiļu pusis, kurai beja vacs lyna audums. Sasatykom i tymā breidī saprotu, ka pi prīškauta tai ari natikšu. Lyna audums izaruodeja grobā laižamais dvīļs i es nagribieju nu juo taiseit gūda prīškautu. Tai meitinei beja leidza ari cyti materiali i storp jim es īraudzeju bryunū vadmolu, i tymā šaļtī saprotu, ka tī saīs Preiļu burnass. Nūkrits nu dabasu!” atguodoj Iveta.

Vadmola bejuse cīši vaca, molys bejušs būjuotys i brīsmeigi smirdiejuse. Tok nu smokys izadevs tiks vaļā, vadmolu miercejūt i skolojūt ūzūla myzu nūvuorejumā. Tuoļuk sekuojuse burnasa dziļuoka izpiete muzejā, māru jimšona i atbylstūšu materialu atrasšona, kas pajāmuse daudzi laika.

Mieteļa ūderi Iveta pasyutejuse Minskā, Boltkrīvejā. Leluokuos gryuteibys saguoduojuse atbylstūša samta atrasšona. Myusu dīnuos samtu puorsvorā izgatavej iz sintetikys bāzis, tok bejs vajadzeigs iz kūkvylnys bāzis izgataveits. Tū Iveta atroduse Gentē, Beļgejā. Izadevs atrast ari kaula pūgys.

Originalais burnass šyuts daleji ar šyumašynu, daleji ar rūkom. Taipoš atdarynojūt darejuse ari Iveta, daļu burnasa sašyvuse šivieja Inguna Puplakse, bet puorejū Iveta poša.

Preiļu burnasa svātki Preiļu Golvonajā bibliotekā 29. oktobrī suoksīs 14.00 stuņdēs. Pasuokumu papyldynuos Tatjanys Kolosovys stuostejums par Preiļu šivieju cunfti 19. g.s. ūtrajā pusē, Vilhelmīnis Jakimovys prezentaceja “Apģērbs latvju dainās, S. Bērziņas atmiņu stāsts”, Ilzis Strēlis foto izstuode “Mans tautastērps Latvijā un pasaulē” i Ingys Circenes privatkolekceja “Tautumeitas”. Pasuokumu ļusteiguoku dareis Smeļteru folklorys kūpa “Golūda”.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.