Roksta autors: portals lakuga.lv

Ar Nautrānu vydsškolys i Baļtinovys vydsškolys vacuokūs klašu audzieknim portals lakuga.lv tykuos oktobra izskaņā, kod kūpā ar muziki Mārtiņu Strodu gasteja školuos i aicynuoja jaunīšus pīraksteit diktatu latgaliski. Piec diktata pīraksteišonys jaunīši dalejuos sovuos puordūmuos par latgalīšu volūdu i juos nūzeimi jūs dzeivē.

Baļtinova i Rogovka ir vīnys nu latgaliskuokajom Latvejis vītom, pīmāram, 2011. goda tautys skaiteišonys dati paruodeja, ka Baļtinovys nūvodā vaira nakai treis caturtdalis īdzeivuotuoju kasdīnā lītoj latgalīšu volūdu. Lela nūzeime latgaliskuma styprynuošonā ir bejuse izcylom ituos pusis viesturiskom personeibom, pīmāram, kai Andryvam Jūrdžam, Pīteram Miglinīkam, Pīteram Jurciņam i cytim, kas latgalīšu volūdu postuliejuši kai vīnu nu leluokūs vierteibu, ar sovu reiceibu styprynuojuši lokalū i taidā veidā ari nacionalū didentitati.

Myusu dīnuos latgaliskuos identitatis i ari latgalīšu volūdys saglobuošonā lela nūzeime ir Nautrānu vydsškolai i Baļtinovys vydsškolai. Jūs vuiceibu spāki īsastuoj par latgalīšu volūdu izgleiteibys procesā i veicynoj sovūs audziekņūs interesi par latgaliskū kulturu i motivej apgiut latgalīšu rokstu volūdu.

Vairumam obejuos školuos satyktūs jaunīšu latgalīšu volūda ir saimis pamatvolūda, bet kai jau tys nūtics daudz kur Latgolā, ar dažim vacuoki nu mozūtnis izavieliejuši runuot latvīšu literarajā volūdā. Tok tys nikai nav trauciejs bārnim īsavuiceit runuot ari latgaliski. Anna soka, ka jei īsavuicejuse volūdu runojūt tymā ar puorejim radinīkim par speiti tam, ka juos vacuoki ar jū latgaliski narunoj.

Satyktī vydsškoļnīki atzeist, ka latgalīšu volūda jim ir nūzeimeiga, i saziņai jī latgalīšu volūdu rauga izmontuot dažaiduos jūmuos, na tikai sarunuos ar vacuokim, vacvacuokim i cytim rodim. “Es latgaliski runoju gon sātā, gon školā, gon ar draugim sasarokstu latgaliski. Nav maņ problemu ni ar latgalīšu volūdu, ni ar latvīšu volūdu. Latgalīšu volūda maņ gon pateik lobuok, jo pīrosts tymā runuot nu bārna kuojis,” soka Kristaps. Jaunīte Laima atzeimoj, ka jei latgaliski runoj ari ar gostim, kuri latgalīšu volūdu kasdīnā nimoz nalītoj.

“Maņ saīt bīži lītuot latgalīšu volūdu, jo mes saimē runojam latgaliski, bīži saīt ari dzīduot latgaliski, skaiteit puotorus voi dzīduot saļmys, muna muote voda folklorys kūpu i mes kūpā bīži pīsadolam koncertūs, dažaidūs pasuokumūs i daudz kur braukojam. Puorsvorā es losu gruomotys latvīšu volūdā, bet, prūtams, sātā ir ari latgalīšu gruomotys. Maņ tagad ir vēļme izlaseit latgalīšu gruomotu, kuru asu sajāmuse pyrms laika,” par sovu pīredzi stuosta Sonora.

Komunikaceja latgaliski storp jaunīšim nūteik na viņ verbali, bet ari rakstiski, lītojūt volūdu socialajūs medejūs, syutūt eiszinis i sasarokstūt aplikacejā “WhatsApp”. Iz gruomotu skaiteišonu latgaliski jaunīši ir gona kiutri, nav interesis i naasūt ari eisti jūs ineresejūšys losomvīlys. Kai vēļ vīns apstuoklis teik mynāts, ka laseit latgaliski ir sarežgeiti. Gruomotu skaiteišona latgaliski vaira nūteik gatavejūtīs latgalīšu olimpiadei i školys fakultativā. Latgalisku tekstu skaiteišonā jaunīšus ari mulsynoj atškireibys storp runuotū i raksteitū volūdu, kai ari divejis pastuovūšuos rokstu volūdys tradicejis.

Roksts sagataveits projektā “Latgales kultūrtelpa: problēmas, analīze un atspoguļojums portālā lakuga.lv”. Projektu finansej Medeju atbolsta fonds nu Latvejis vaļsts budžeta leidzekļu.