Rokstu sagataveja: portals lakuga.lv

Nu 17. janvara kinoteatrūs varēs vērtīs Vīstura Kairiša jaunuokū filmu, viesturiskū dramu “Piļsāta pi upis”. Filma veiduota latgalīšu volūdā, i juos pamatā ir attīceibu stuosts iz paguojušuo godu symta 30.–40. godu viesturiskūs nūtykumu puormaiņu fona. Nupat publicāts filmys treilers.

Filmys “Piļsāta pi upis” scenareja pamatā ir latvīšu trymdys autora Gunara Janovska taida poša nūsaukuma romans. Filmys golvonajam varūņam Aņšam ir navaineiga profeseja daiļmaļavuotuojs, i jis ir pīpraseits pi vysom varom, kas pīcu godu laikā nūsamaina vairuokys reizis.
Patosa pylnūs ulmaņlaiku vītā atīt skorbais komunistu, tod nacistu režims. Aņša īcarātuo ir ebreju meitine Zisla, tok jaunuos sīvītis tāvs līk jūs mīlesteibai škieršļus. Saīt tai, ka itymā laikā Aņša dzeivē uzarūn ari šmukuo latvīte Naiga. Storp treis varom, kas sabrodoj Aņša piļsātu, divom sīvītem, kas plūsa juo sirdi, īspiejama tikai vīna izvēle.

Filmā byus dzieržamys vairuokys volūdys: latvīšu, tymā skaitā latgalīšu, krīvu, vuocu, jidišs, jo volūdu mikslis beja dabiska paruodeiba laikā, kod multikulturalā vidē cīši sūpluok dzeivuoja dažaidu tauteibu cylvāki i eisā pūsmā nūsamaineja vairuokys varys. Pamatā filmys varūni runuos latgaliski, itim tekstim filmā paradzāti titri latvīšu literarajā volūdā.
Nu Latgolys īt filmys golvonuo varūņa Aņša lūmys akters Dāvis Suharevskis, itei ir juo pyrmuo lūma. Puorejuos lūmuos akteri: Agnese Cīrule, Gundars Āboliņš, lītuvīšu kino legenda Jozs Budraitis i čehu aktrise Brigita Cmuntova.

Vīsturs Kairišs filmu veidoj kūpā ar sovim ilggadejim radūšajim partnerim – muokslineicu Ievu Jurjāni i operatoru Gintu Bērziņu. Studejā “Ego Media” producātū filmu finansej Nacionalais kino centrs, ari Leitovys i Čehejis kino institucejis, atbolsta Kruoslovys, Ludzys, Rēzeknis i cytu Latgolys piļsātu pošvaļdeibys, kai ari “Latvijas Finieris”, “Circle K”, “Merrild”, “Salmo”, “Tvaikonis” i cyti. Filmas partneri: LTV i LMT.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.