Roksta autore: Vineta Vilcāne, portals lakuga.lv

Latgalīšu aktivisti daudz i dažaidūs veidūs popularizej latgalīšu volūdu i latgaliskū kulturu. Tok nareši tys daļā sabīdreibys izraisa nagativu reakceju. Tū spylgtai ilustrej interneta medeju komentaru sadalis pi rokstim, kuru saturs saisteits ar latgalīšu volūdys vaicuojumim.

Kai veicynuot sabīdreibā pozitivu attīksmi pret latgaliskū, portals lakuga.lv vaicoj žurnala “A12” redaktorei INĀRAI GROCEI, Sabīdreibys integracejis fonda puorstuovei ALDAI SEBREI i Saeimys deputatam EDMUNDAM TEIRUMNIEKAM.

Ināra Groce, žurnala “A12” redaktore:

Informacejai, kas īt nu Latgolys nav juobyun tikai pozitivai, ir juoatspīgelej dažaidi vīdūkli, bet navajadzātu tūs pasnīgt kai tikai vīneigūs pareizūs. Asmu runuojuse ar daudzim cylvākim, kas nav latgalīši, i jūs satrauc, pīmāram, ka mes gribim īvīst latgalīšu volūdys apvuiceibu vysā Latvejā. Tys paruoda, ka ir pagaisuse komunikaceja, pītryukst informacejis.

Ir vajadzeigs laiks, lai izveiduotu latgaliskū apziņu, lai cylvāki, kurim latgalīšu volūda ir dzymtuo, patīsi ar tū lepuotūs, navys ītu ar volūdu tikai kai ar karūgu. Volūdu ir juosavuica pasnīgt, lai puornūvadnīki saprostu, ka tei ir vierteiba, kas papyldynoj ari jūs, na tikai myus, latgalīšus, ka latgalīšu volūda ir latvīšu volūdys sastuovdaļa. Tys ir ļūti atkareigs nu pošu latgalīšu attīksmis.

Volūdu navajag uzspīst, jo jebkas, kas teik uzspīsts, roda pretreakceju. Juopasnādz tū pozitivi, bez agresejis, kas reizem nūteik saisteibā ar latgaliskū.

Mes vys moz zynom vīns par ūtru, informaceja socialajūs i masu medejūs latgalīšu volūdā ir ļūti loba īcere i tys ir napīcīšams. Ka roksts ir par interesantu cylvāku, temu i teik labi pasnāgts, es dūmoju, ka ari tī, kas latgalīšu volūdu na tik labi puorvolda, rokstu izlaseis. Ir svareigi, ka latgalīšu volūda ir publiskajā telpā, muzykā, avīzēs, žurnalūs. Cylvāki ar laiku pi tuos pīrass i uzjims kai pošsaprūtamu, latvīšu literarajai volūdai sūpluok pastuovūšu. Pīmāram, kod Jurs Viļums pyrmū reizi nūdeve zvārastu latgalīšu volūdā, beja lelys diskusejis – var voi navar nūdūt, jis pīruodeja, ka var. Paguojušajā godā jau četri deputati zvārastu nūdeve latgaliski i nabeja rezonansis, vysi tū suoce pījimt kai pošsaprūtamu. Tam beja vajadzeigs laiks.

Alda Sebre, Sabīdreibys integracejis fonda Projektu nūdalis vadeituoja:

Nanūlīdzami latgalīšu volūda ir byutiska Latvejis kulturviesturiskuo montuojuma daļa i svareigi ir tys, ka latgalīšu volūda i tuos lītuošona kasdīnā ir sasaglobuojuse da myusu dīnu. Latgalīšim sova dzymtuo volūda ir sovys identitatis aplīcynuojums, tei ļaun vīnlaikus byut gon unikalim, gon justīs pīdereigim latvīšu tautai.

Vys vēļ latgalīšu volūda teik lītuota kasdīnā, teik izdūta literatura, kai ari tū var dzierdēt radejā i televizejā. Svareigi, ka volūdu lītoj na tikai vacuo paaudze, bet arī jaunīši, kuri ir lapni par itū sovys identitatis škautni.

Myusupruot, vaļstei ir juoveicynoj latgalīšu volūdys i kulturys unikalitatis saglobuošona vysys vaļsts i Eiropys kontekstā.

Sabīdreibys integracejis fonds ir finansiejs vairuokus projektus, pīmāram, projektu “Biedrības “Radošās Idejas” darbības stiprināšana pilsoniskās sabiedrības aktivizēšanai Ziemeļlatgalē” 2019. godā, kurā nūteikti izapaude ari latgaliskais elements.

Edmunds Teirumnieks, Saeimys Cylvāktīseibu i sabīdriskūs lītu komisejis Latgolys apakškomisejis prīkšsādātuojs:

Vaicuojums ir sarežgeits i gryuts, jamūt vārā attīksmi sabīdreibā, kas veiduojusēs padūmju godūs i ari naatkareigajā Latvejā. Latgolā latgaliskais vysod ir bejs pabārna lūmā.

Vīna nu pamatproblemu, par kū latgalīšus nasaprūt, ir myusu pošu īkšejuos nasaskanis, pīmāram, raksteibys vaicuojumūs.

Mes navarim sovā storpā vīnuotīs, pliešamēs, partū navarim dūt kūpeigu uzstuodejumu. Partū puorejuo Latvejis sabīdreiba myusu nauztver nūpītni, kod mes tiksim ari sovom īkšejom lītom golā i īsim ar vīnuotu vizeju, tod myus ari akceptēs.

Nareši ir ari dualys darbeibys, teik īsastuots par latgalīšu volūdu, pīpraseits tū lītom, bet tymā pošā laikā sovuos saimēs latgaliski nateik runuots, izaver piec divkūseibys.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.