Rokstu sagataveja: portals lakuga.lv

Decembra vydā Latgolys viestnīceiba GORS izsludynuoja pretendentu dasaceišonu Latgalīšu kulturys goda bolvai “Boņuks”, kas ik godu ir vīna nu gaideituokūs nūtikšonu latgaliskajā kulturā i vīneiguo naatkareiguo bolva, kura eipaši izceļ i gūdynoj sasnāgumus i padareitū latgaliskajā kulturys dzeivē, kai ari paruoda tuos tendencis. Tok decembra izskaņā bolvys organizatori sajēma ziņu par Vaļsts kulturkapitala fonda lāmumu par atbolstu vaļstiski nūzeimeigim pasuokumim 2020. godā i Latgalīšu kulturys goda bolvys atbolstamūs aktivitašu vydā vaira nav, portalu lakuga.lv informej Latgolys viestnīceibys GORS puorstuove Edeite Husare. Bolvys reikuotuoji nasliepj, ka ar leidzšinejom aktivitatem godu gaitā rodušuos cereibys, ka latgaliskuos nūrisis teik augši nūvārtātys, tok atbolsta nasajimšona i asūšuo situaceja “Boņuka” organizatorim līk dūmuot par bolvys turpmuokuos pastuoviešonys īspiejom.

Latgalīšu kulturys goda bolvys “Boņuks” mierkis vysod ir bejs veicynuot latgalīšu kulturvidis saglobuošonu i atteisteibu. Tymā sūpluok pārnejuo gods spylgtuokūs i nūzeimeiguokūs latgaliskuos kulturys nūtikšonu, personeibu, aktivitašu apkūpuošonai i gūdynuošonai svareiga ir ari latgalīšu kulturys tendenču paruodeišona. Latgalīšu kulturys goda bolva naaptver tikai Latgolys regionu, bet ari paruoda latgaliskū ari cytvīt Latvejā i pasaulī.

Vaļsts kulturkapitala fonda lāmums naatbaļsteit bolvys nūrisi vaļstiski nūzeimeigūs pasuokumu vydā Latgalīšu kulturys goda bolvys “Boņuks” reikuotuojim radejs naizpratni. Turkluot atbaļsteitūs nūrišu vydā ari nav nivīna cyta nūtykuma, kas kaidā veidā atsasauktūs iz latgaliskū kulturu, atzeimoj E. Husare.

Bolvu “Boņuks” pyrmū reizi padeva 2009. godā, Latgolys viestnīceiba GORS bolvu reikoj nu 2013. gods i pādejūs godūs, pasasokūt atbolstam vaļstiski nūzeimeigūs nūtykumu programā, cīši pīauguse gon bolvys kvalitate, gon rezonanse, nūruoda Latgalīšu kulturys goda bolvys organizatori.

Nasajamūt carātū atbolstu, bolvys reikuotuoji ir puordūmuos par bolvys turpmuokū pastuoviešonu. Kai nūruoda organizatori, saglobuot jau sasnāgtū leimini pošu spākim nabyus īspiejams. Asūšuo situaceja Latgolys viestnīceibai GORS līk apdūmuot, kū dareit nuokūtnē i kaidus rysynuojumus naprognozejamajam finansialajam atbolstam i izpratnis veicynuošonai meklēt nuokušajim godim.

Pasuokuma reikuotuoji ir pateiceigi par atbolstu bolvys nūrisei Latgolys kulturys programai, kai ari Latgolys regiona pošvaļdeibom, kas kotru godu snādz finansiali nalelu, tok morali cīši nūzeimeigu atbolstu “Boņuka” pastuoviešonai. Latgolys viestnīceiba GORS aicynoj, ja kaidam individualajam atbaļsteituojam ci uzjiemiejam ir vareiba i interese atbaļsteit ituo gods “Boņuks 2019” nūrisi, sasazynuot, rokstūt iz bonuks@rezekne.lv ci zvonūt 26144533.

Bolvys “Boņuks 2019” padūšonys ceremoneja paradzāta 2020. gods 23. februarī Rēzeknē, Latgolys viestnīceibā GORS. Leidz 6. janvaram aicynoj dasaceit bolvys pretendentus par padareitū pārnajā godā. Vaira informacejis par dasaceišonu var atrast bonuks.lv.