Rokstu sagataveja: portals lakuga.lv

Latgalīšu mārgu grupa “Trešīs Ņutona lykums” 2020. godu īsuokuse ar jaunu dzīsmi “Īvalku gaisu”. Itamā reizē grupa gon dzīsmē, gon vizualajā nūformiejumā ījāmuse naīrostai juteklisku i drupeit romantisku tālu.

Par dzīsmi “Īvalku gaisu” grupys dalineicys soka: „Gaiss i jimā asūšī 20,95% skuobekļa ir tī, kas myus vysus uztur pi dzeiveibys. Kai mes vysi labi zynom, izplateituokuo kimiskuo elementa skuobekļa izotopa molmasa ir 16. Tys var veicynuot gon guņs degšonu, gon saryusynuot vyscītuokū dzeļzi. Bet tys var byut ari kai simbols cylvāku sovstarpejai energejis amaiņai. Mes kotru dīnu vīns nu ūtra īsatekmejom, vīns ūtru slavejom, lomojom, rūnom vīns ūtrā emocejis i energeju. Mes vīns ūtram asam kai skuobeklis. Cylvāks ir sociala byutne. Cylvāks navar dzeivuot bez skuobekļa i bez cyta cylvāka.”

Grupā “Trešīs Ņutona lykums” apsavīnuojušys pīcys mārgys – Daina Kudravska (bolss, sytamī instrumenti), Sintija Augustova (bolss, tausteni), Laura Kudravska (bolss, elektriskuo gitara), Viola Lapa (elektriskuo gitara) i Laura Višķere (basa gitara). Dzīsmis “Īvalku gaisu” teksta autore ir Viola Lapa, muzykys autors ir Guntis Rasims, pi dzīsmis aranžiejuma struoduoja pošys grupys daleibneicys. Īroksti veikti Bieržgaļa „Skaņu laboratorejā”. Mikss, māsters – Nick Dawes „La Source Studio” (Franceja). Par grupys vizualū foto nūformiejumu guoduoja Viola Lapa.