Rokstu sagataveja: portals lakuga.lv

Skateituoju viertiejumam nūdūta latgaliskuo filma “Piļsāta pi upis”, portals lakuga.lv pīduovoj septeņus interesantus faktus par filmys tapšonu i juos sižetu.

1. Filmys uzjimšonā pīsadola vaira nakai 2000 cylvāku

Filma “Piļsāta pi upis” topa pīcus godus, i juos uzjimšonā pīsadaleja vaira nakai 2000 cylvāku. Eipaša lūma ir Latgolys vītejim īdzeivuotuojim, kuri ar lelu entuziasmu pīsadaleja fiļmiešonā gon +30 grādu korstumā, gon –30 grādu soltumā.

2. Golvonajā lūmā naprofesionals akters

Golvonajā – maļavuotuoja Aņša lūmā – ir naprofesionals akters, 25 godus vacais Dāvis Suharevskis, kurs pats ir nu Gaigalovys. Režisors Vīsturs Kairišs Dāvi izavēlēja, jo jis ir “piļneigs teirradņs”. Kasdīnā Dāvis studej Reigā kimeju i struodoj uzjāmumā “Madara Cosmetics”. Fiļmiešonys procesu jis saleidzynoj ar amalgaceju. Iz alumineja plāksnis, uzpylynojūt dzeivsudroba suoļu škeidumu, rūnās cīši interesanti veiduojumi. “Apmāram tai ari jiutūs – akterim, režisoram, videi iz mane īsadorbojūt, rodās Aņša lūma,” stuosta Dāvis.

3. Ūtruo profesionaluo filma latgaliski

“Piļsāta pi upis” ir ūtruo profesionaluo muokslys filma, kas uzjimta latgalīšu volūdā. Tei ir unikala paruodeiba latvīšu kinematografā. Režisoram i filmys veiduotuojim nūlamūt, ka juofiļmej latgaliski i Latgolā, vyss nūsastuojs sovuos vītuos, bejs skaidrys, ka filmai juobyun napīradynuotai, drupeit trokai i ar Latgolai rakstureigu humoru. Filmā dzieržamys ari daudzys cytys volūdys, kai krīvu, vuocu i idišs.

4. Filmys kuģam nūsamaina četri nūsaukumi

Vīns nu filmys centralūs objektu ir kugis. Kai jauns režims, tai Aņšam dorbs, jo juomaina nūsaukumi na tikai īlom i kabinetu uzrokstim, bet ari kuģam. Suokumā tys ir “Boltais guļbs”, kai jau tys latgaliski dasaīt, Ulmaņlaikā kugi juopuordievej literari pareizi – par “Balto gulbi”, pi sorkonajim kugis palīk par “Krasnaja Avrora”, bet, atejūt nacistim kugi puordievej par “Weisser Schwan”.

5. Atsaucis iz muokslinīku Marku Šagālu

Ar operatoru Gintu Bērziņu V.Kairišs ir sasadorbuojs jau īprīšk, pīvadumam, filmā “Mēlānijas hronika”. Sleipais horizonts “Piļsāta pi upis” ir muokslinīcisks pajiemīņs, kas raksturoj nastabilū i saškūbeitū laiku, gon atsauce iz reiz natuoli Vitebskā dzeivojūšū muokslinīku Marku Šagālu.

6. Autentiskū vidi roda eisti prīkšmati

Filmys muokslineica Īva Jurjāne uzskota, kod apleik ir eisti prīkšmati i radeita autentiska vide, ari akterūs nūteik vajadzeiguo transformaceja. Gon Bernšteina veikals, gan Naigys saimis apteka beja īkuortuota da pādejuo seikuma ar dažaidom autentiskom ci viesturiskajam izskotam maksimali pītuvynuotom lītom – traukim, buteleitem, baņceņom i ttt. Aptekys vitrinā beja īlyktys ari, pīvadumam, porcelana acs, i nikas, ka filmā juos nav radzamys. Kai stuosta Dāvis Suharevskis, juo varūņs zyna, ka tuos tys ir, i tys, īsajiutūt lūmā, ir cīši svareigi.

7. Filmā radzamūs gleznu autors ir muokslinīks Reinis Pētersons

Filmys golvonajam varūņam, muokslinīkam Aņšam ir lelys ambicejis – jis grib byut muokslinīks. Eipaša nūzeime filmā ir vacuo ebreju tierguotuoja Bernšteina portretam. Aņša gleznu i zeimiejumu patīsais autors ir muokslinīks Reinis Pētersons.