Rokstu sagataveja: portals lakuga.lv

Latgalīšu repere Ūga pavysam naseņ izdave sovu pyrmū solo albumu “LG ir HH”. 29. februarī 22.00 stuņdēs kopejneicā “Asumeņa Kebabs” Rēzeknē nūtiks albuma prezentaceja, kurymā pīsadaleis ari Ūgys kolegys.

Vaicojūt par jaunū albumu i juo viestejumu, Ūga portalam lakuga.lv īprīšk sacejuse: “Taiseju muzyku, kas maņ nese jumtu nūst, munuprot, es klauseituoju raunu īškā izdzeivot leidza vysam myusu stuostam, kai vyss suocēs – kusteiba, muzyka. Apbreinojami lykos sevi sajimt rūkos i redzēt, ka nimoz nav tik gryuši sabeideit tūs tryukstūšūs klučus kūpā. It eipaši, ka ir taida komanda kai maņ. Tikpat svareigys vysys sadarbeibys, kas ir albumā. Pateikami struodot ar kolegom, kas dorbojās tymā pat lauceņā.”

Albuma “LG ir HH” prezentacejis pasuokumā apsavīnuos puorstovi nu diveju hip-hopa apvīneibu, kas īroksta muzyku vīnā studejā – pi JEZUPA. Vokora gaitā varēs dzierdēt “Ausmeņa Records” i MKH41. “Pasuokuma laikā uz skotivis kuops MKH41 dybynuotuojs, repers – Bruolāns. Pa itū laiku jis ir izdevs vairuokus gobolus iz vacuo lobuo undergrounda viļņa. Ir sasadorbuojs ar “Ausmeņa Records”, kai ari ar Latvejā labi pazeistamajim reperim Nātre i AKE. Pošlaik MKH41 gatavej jiusu ausim jaunu materialu, tai ka nivīns te nadūmoj gulēt,” par gaidomū prezentaceju stuosta Ūga.

“Kai kusteiba MKH41 pastuov nu 2014. gods. Apvieneibā ir puorstuovāta latvīšu, krīvu i latgalīšu valūda, i tuos mierkis ir byut par sova laika i vidis reporterim – runuot par nūtykumim i problemom, daleitīs ar paguotnis personeigū pīredzi, bet golvonais – dareit tū, kas pateik pošim,” soka Bruolāns.

Vokora gaitā par lobu muzyku ryupēsīs DJ Valns. Jis ar hip-hopu īsapazyna 2007. godā, kod suoce trenētīs breiku i tyvuok īpazyna itū kulturu. Tāņ hip hops ir paļics par naatjamamu juo dzeivis sastuovdaļu, i nūsadorboj ar djingu, prakatizej skreču i bītdžanglingu.