Rokstu sagataveja: portals lakuga.lv

Rēzeknis Tehnologeju akademeja izveiduojuse Austrumu diasporys latgaliskūs izlūkšņu īrokstu datubāzi “Reitu diaspora”. Jamā īlykti dialektologejis ekspedicejis pi Sibira latgaliskūs izlūkšņu runuotuojim īgiutī īroksti i transkribāts teksts, portalu lakuga.lv informej RTA puorstuove Lolita Kivleniece-Kuzņecova.

Datubāze “Reitu diaspora” reiti.rta.lv ir RTA zynuotniskuo granta projekta “Austrumu diasporas latgalisko izlokšņu ierakstu datubāzes izveide” rezultats. Datubāze ir publiski daīmams interneta resurss, kur īlykti i dialektologejis ekspedicejuos pi Sibira latgaliskūs izlūkšņu runuotuojim gon īgiutī videoīroksti, gon transkribāts teksts. Jimā ir eistynuotys mekliešonys īspiejis, īrokstūt atslāgvuordu, daīmami metadati (respondenta dzeivisvīta, vacums, dzymums, izgleiteiba). Daīmama karte, kuramā apzeimātys interviešonys vītys, video īrokstu galereja (dzīsmis). Sātys lopā īlykta ari informaceja par austrumu diasporu, pietejumi, papyldu resursi. Datubāzi plānuots pylnveiduot i papyldynuot.

Datubāzi veiduojuši RTA studenti Armands Kociņš i Aleksandrs Rogačovs, kai ari profesors Pēteris Grabusts. Bolstūtīs datubāzē īvītuotajūs datūs, A. Kociņš veics pietejumu “Verbu semantikas īpatnības Sibīrijas latgaliešu mutvārdu tekstos”, kas bejs ari juo bakalaura dorbs.

Datus, obligati atsasaucūt iz olūtu, ir varams izmontuot zynuotnisku pietejumu, vuiceibu leidzekļu, turisma materialu sagataveišonai.

Austrumu diasporys latvīšu (tūstorp Latgolys latvīšu) dzeivisstuostu, volūdys i tradiceju izpiete Latvejā ir eipaši aktuala nu 2004. gods, kod tyka īsuokta ekspediceju sereja pi Krīvejis Federacejā i Boltkrīvejā dzeivojūšajim latvīšim. Ituos ekspedicejis golvonūkuort ir organiziejuši Latvejis Universitatis pietnīki (Janīna Kursīte, Lideja Leikuma i c.) sadarbeibā ar Sanktpīterburgys Vaļsts universitatis pietnīkim (Aleksejs Andronovs). Da ituo kai byutiskuokī etnolingvistiskūs ekspediceju pi Sibira latgalīšim rezultati pīmynami: īgiutūs materialu izpiete i populariziešona zynuotniskuos konferencēs, zynuotniskuos publikacejis, Sibira latgalīšu kulturys dzeivis aktiviziešona i volūdys kursi, Austrumu diasporys tautīšu braucīņu iz Latveju organiziešona; izdavumi “Sibīrijas latviešu dziesmas”, “Latvieši latviešu acīm: Sibīrija. Timofejevka” i c.

Projekta rezultats ir nūzeimeigs ari pošim Austrumu diasporys puorstuovim kai identitatis saglobuošonys i volūdys apgivis leidzeklis.