Latgalīšu olimpiade i “Vuolyudzāni” puorcalti iz septembri
Rokstu sagataveja: portals lakuga.lv
18. aprelī beja planavuots skotuvis runys konkurss “Vuolyudzāni” i 20. atkluotuo latgalīšu rokstu volūdys i kulturviesturis olimpiade, tok koronavirusa pandemejis deļ obeji pasauokumi puorcalti iz 26. septembri, portalu lakuga.lv informej organizatori.
Gon olimpiadis, gon skotuvis runys konkursa mierkis ir veicynuot kulturys vierteibu i izcyluokūs nūvadnīku apzynuošonu školuos, rūsynuot školu jaunatnis interesi par latgalīšu volūdu i kulturviesturi.
“Turpynuosim struoduot, īvāruosim vysys drūšeibys praseibys, lai piec karantinys atsagrīztu īprīškejā dzeivis rytmā, kuru, īspiejams, vairs nauztversim kai ogruok. Itys laiks liks puorviertēt dzeivi, myusu attīksmi pret vierteibom, pret cylvākim. Kai olimpiadis moto vīnu godu beja Nautrānu dyžuo nūvadnīka, gora gaismys nesieja Andryva Jūrdža zalta gryudeņš nu“Myužeyguo kalindera”: “Nasadzeņ augstuoks par cytim byut, bet dzenīs lobu dareit i gudruoks kliut.”
“Myužeygays kalinders” piļneibā bolstuos iz divejom miļzeigom vierteibom — ticeibu i tautys gudreibu. Ticēsim i mes lobajam cylvākūs i byusmi gudri itymā laikā!” soka vīna nu “Vuolyudzānu” i olimpiadis organizatoru, Nautrānu vydsškolys školuotuoja Veronika Dundure.
