Roksta autors: portals lakuga.lv

Hip-hopa apvīneiba “MKH41” nupat izdavuse debejis albumu “Latgaļīšu Reps”, kas ir apvīneibys vizeja par tū, kai juoskaņ latgalīšu repam. Albums ir ari “MKH41” dalinīku personeigs stuosts par pīdzeivuotū.

Apvīneibys “MKH41” pyrmsuokumi meklejami 2015. godā Rēzeknē, kod Bruolāns puorsavuoce iz Rēzekni. “Satyku seņ naradzātu bīdru, ar kuru kūpā īrieju dzeivūkli. Tī nūtyka džemi – skaitejom frīstailus, nūtyka breika dejis īrūbežuotā plateibā i cytys hip-hopa kulturai rakstureigys aktivitatis. Darejom tū, kas pateik, lai ikdīna byutu interesantuoka. Gostūs guoja Jezups, Valns, Nikita, ari Arča beja bīžs vīss, kaut dzeivuoja Ludzā.

Byuteibā tei beja vīta, iz kuru atīt i labi pavadeit laiku ar leidziegi dūmojūšim cylvākim. Jezups beja tys, kurs mudynuoja myus kuorteiguok pīsavērst repam, jo tymā laikā nadarejom tū tik nūpītnā leiminī. Īmūt laikam, mainejuos apstuokli, bet kontakts napazuda. Kai spylgtuokais moments atmiņā paļics, kod gostūs beja DJ VALNS i lyka muzyku nu plašu, vīnustobys dzeivūklī bejom kaidi 15 cylvāki. Vāluok, kod Jezups izveiduoja studeju, nūsprīdem, ka juoroksta albums ar “MKH41” vuordu, jo tys beja myus vysus vīnojūšs laiks i vīta,” atguodoj Bruolāns.

“MKH41”apsavīnuojuši Rēzeknis bītmeikeri –  Nikita Grapp, Jezups, DJ VALNS, kas ir ari “Ausmeņa Records” bīdrs, i reperi –  Bruolāns, Archa1177, Mesa i Pluto.

Apvīneibys debejis albuma “Latgaļīšu Reps”stuosti atkluoj dalinīku personeigū pīredzi, i jī poši sevi sauc par apleik asūšuos vidis reporterim.

“Atstuojam daļu nu sovys bagažys iz bīta, lai cytim byutu īspieja īsaklauseit i naatkuortuot myusu pīļautuos kliudys,” par albuma viestejumu stuosta apvīneiba. Kai jau albuma nūsaukums viestej, kompozicejis izpiļdeitys latgaliski. Vaicojūt, ar kū latgaliski izpiļdeits reps atsaškir nu puorejuo Latvejis repa, apvīneiba atsoka: “Pyrmom kuortom, ar volūdu. “MKH41” repoj iz sovu, vītejū bītmeikeru bītim, tys nūteikti īdūd sovu, cytim narakstureigu skaniejumu.”

“MKH41” jaunuo albuma nūsaukums “Latgaļīšu Reps” kaidu varātu mulsynuot, jo taids pats nūsaukums ir nu Ludzys nuokušajai i lelu atpazeistameibu īmontuojušajai apvīneibai, kuramā dorbojās Ivo Grigalis i Dzidzis Kozlovs. Vaicojūt, parkū albuma izvālāts taišni itaids nūsaukums, Bruolāns stuosta:

“Devem albumam taidu nūsaukumu apzynuoti. Lai cylvākim kliudaini vyss latgalīšu reps naasociātūs ar vīnu vysim labi zynomu projektu, kurs ir tuols nu repa i ar hip-hopu tam ari nav sakara. Hip-hops ir kultura, kurā bez repa ītylpst ari DJ’ings, graffiti i breiks. Mes ar šū albumu paruodejom, kai skaņ eists reps lobuokajuos žanra tradicejuos.”

“MKH41” dalinīkim ir svareigi sovu muzyku izpiļdeit latgaliski, jo volūda ir daļa nu jūs identitatis i leluokajai daļai apvīneibys bīdru latgalīšu volūda ir dzymtuo. Ar sovu radūšū darbeibu jī ari grib popularizēt volūdu, lai jaunīši turpynuotu runuot latgaliski i volūda turpynuotu dzeivuot. Apvīneibys dalinīki repoj ari latvīšu literarajā i krīvu volūdā. “Hip-hops vīnoj!” atzeimoj Bruolāns.

Tyvuokajā nuokūtnē “MKH41” bīdri planavoj struoduot pi solo projektim, atkluoj Bruolāns: “Archa1177 roksta miksteipu, es ar Jezupu struodoju pi kūpeiga albuma “Bagāža”, byus ari miksteips nu Pluto i materials nu Mesys. Nasataisom pazust piec albuma izlaisšonys.” Apvīneibys jaunumi var sekuot leidza facebook.com/41MKH.