Roksta autors: portals lakuga.lv

2020. gods izskaņā, 23. decembrī, latgalīšu dzejnīkam, publicistam, kulturys i sabīdryskajam darbīnīkam Ontonam Kūkojam palyktu 80. Dzejnīks myužeibā nūguoja 2007. godā, tok juo literarais montuojums nikur nav pagaiss, i itūgod transformēsīs jaunūs formatūs. Gaidūt Ontona dzimšonys dīnu, nūteik dorbs pi juo dzejis gruomotys “Mīlesteiba, Lelais Līpu kolns” puorizdūšonys i dzejis izruodis, portalam lakuga.lv atkluoj J. Soikāna Ludzys muokslys školys direktore Sandra Vorkale.

Ideja par Ontona Kūkoja 1995. godā publicātuos dzejis gruomotys “Mīlesteiba, Lelais Līpu kolns” puorizdūšonu rodusēs pārņ. Vaicojūt, parkū izlamts puorizdūt taišni itū gruomotu, J. Soikāna Ludzys muokslys školys direktore Sandra Vorkale stuosta: “Tys ir subjektivs viertiejums, bet maņ itei ruodīs vīna nu skaistuokūs dzejis gruomotu par mīlesteibu. Nu gruomotys izdūšonys ir paguojuš 25 godi, dzejūli paliks puorpersoniski, jī nav saisteiti tīši ar dzejnīkam jiutom pret kaidu konkretu cylvāku.”

Idejis vierzeituojim gribiejīs gruomotai dūt kaidu pīvīnuotū vierteibu, tai rodusēs dūma par dzejis izruodi, kurā caur Kūkoja dzeju teik izdzeivuots sīvītis i veirīša mīlesteibys stuosts.

“Itymā stuostā veirīts i sīvīte runoj dažaiduos volūduos. Puiss runoj latgaliski, bet meitine zeimu volūdā. Jī sasateik, īsamīlej vīns ūtrā, jim ruodīs, ka vyss ir tik vīnkuorši, golu golā saprūt, ka nimoz tik vīnkuorši nav. Jī puordzeivoj sovu pyrmū krizi, piec tam atsagrīž vīns da ūtra ar dīzgon lelu cereibu, ka kotrys varātu runuot sovā volūdā, bet tūmār sasaprast,” par dzejis izruodi stuosta S. Vorkale.

Projektu eistynoj J. Soikāna Ludzys muokslys škola i bīdreiba “Teātris azotē”, kurys vadeituoja Marika Čerņavska ir dzejis izruodis idejis autore i režisore. Mīlesteibys stuostu izdzeivoj – akters i muziks Kristaps Rasims, kurs speciali izruodei radejs treis jaunys dzīsmis ar O. Kūkoja vuordim, i nadzierdeiga meitine Jolanta Znotiņa, kas ir profesionala aktrise. Puorizdūtajai gruomotai tiks davīnuots QR kods, kas aizvess iz izruodi škārsteiklā. Izruodi izruodeis školuos i gruomotys prezentacejā, kas planavuota pyrmsadventa laikā. Piečuok planavuots izruodi īkļaut programā “Latvijas skolas soma”. Izruode pamatā dūmuota vydsškolnīkim, i izruodi ar div akterim ir vīgli nūvest iz dažaidom vītom. Tuos garums ir ap 30 minotu i īsakļaun vuiceibu stuņdis garumā, atzeimoj S. Vorkale.

Fotografejis nu izruodis papyldynuos dzejis gruomotu. O. Kūkoja dzeju varēs skaiteit ari naredzeigi ļauds, puorizdūtajā gruomotā īkļaus 12 dzejūļus braila rokstā. Planavuots ari konkurss ilustracejom. “Ka zeimiejumi byus vārā jamami, tod mes gribim ar tim sataiseit dzejis kalendaru. Ludzys muokslys škola kotru godu taisa kalendaru, nuokušajam godam varātu byut dzejis kalendars ar Ontona dzeju,” nūruoda S. Vorkale.

Cikom teik gaideita gruomotys izdūšona, tymā īkļautū O. Kūkoja dzeju var skaiteit speciali izveiduotajā Facebook.com lopā “OKa”, kur dzejūļus papyldynoj fotokartenis nu izruodis. Gruomotā byus īkļauts 91 dzejūļs, kurus treis mienešu garumā publicēs Facebook.com.