Roksta autors: portals lakuga.lv

Izguojuse gruomota “Stuosti iz Aulejis”, kuramā apkūpuoti vaira nakai 20 Aulejis senioru atmiņu stuosti. Gruomotys idejis autore i sastuodeituoja ir Kruoslovys Vaļsts gimnazejis školneica Antra Umbraško.

Gruomotys autorei Antrai Umbraško bejuse cīši lela interese par sovu pogostu, i tai rodusēs dūma izdūt gruomotu. Kab izveiduotu gruomotu, Antra tykusēs ar Aulejis pusis seniorim i pīrakstejuse jūs dzeivisstuostus. Gruomotā “Stuosti iz Aulejis” īkļauts vaira nakai 20 vacuokuos paaudzis cylvāku atmiņu stuostu.

Antra vuicuos Kruoslovys Vaļsts gimnazejis 12. klasē, jaunīte atzeist, ka viesturis nūtykumi, klausūtīs cylvāku stuostūs, ruodīs pavysam sovaižuoki, na kai par tim losūt školys vuiceibu gruomotuos. “Cylvāku, ar kurim es runuoju, dzeivēs ir nūtykušys pruotam naaptveramys lītys. Sarunys ar jim mani īdvesmuoja i gols golā saguoja gruomota,” soka Antra. Vaicojūt, voi autore planavoj sovu nuokūtnis profesionalū nūsadorbuošonu saisteit ar viesturi, jaunīte atsoka: “Es nikod nasoku, nā, bet tod jau redzēs, kai saīs.”

Gruomotys izdūšona latgalīšu volūdā Antrai ruodejusēs pošsaprūtama, jo vairums Aulejis īdzeivuotuoju runoj latgaliski. Jaunītis iniciativu finansiali atbaļstejuse Kruoslovys nūvoda dūme.

Vaira par gruomotu “Stuosti iz Aulejis” i tuos autori varēs izzynuot 14. majā attuolynuotajā sasatikšonā ar Antru Umbraško. Kab tymā pīsadaleitu, īprīkš juopīsasoka, pīzvonūt iz telefona numeri 65681114, voi rokstūt iz epostu kncb.bln@inbox.lv.