Rokstu sagataveja: portals lakuga.lv

Suocīs Latvejis sabīdryskūs medeju goda bolvys kulturā “Kilograms kultūras 2020” pavasara bolsuojums. Iz bolvu pretendej ari latgaliski projekti kategorejuos – “Kino”, “Montuojums” i “Puorsteigums”.

Bolvys “Kilograms kultūras 2020” nominantus skateituoji i klauseituoji izvierza trejūs bolsuojumūs. Bolsuot par spylgtuokajom kulturys nūtikšonom portalā LSM.lv var leidz 22. maja 23.59 stuņdem. Bolsuot var ITE.

Kategorejā “Kino” iz bolvu pretendej Vīstura Kairiša filma “Piļsāta pi upis”. Lakuga.lv arhivā var skaiteit vairuokus rokstus par filmu. Interveja ar filmys režisoru Vīsturu Kairišu, ar aktrisi Agnesi Cīruli, golvonuos lūmys atveiduotuoju Dāvi Suharevski, kai ari izzynuot interesantus faktus par filmu.

Kategorejā “Mantojums” bolvai izvierzeita bīdreibys “Latgolys Studentu centrs” izdūtais latgalīšu dzīšmu kruojums “Muna dzīšmu gruomota”. Dzīšmu kruojumā apkūpuotys 120 vysaidu Latgolys vītu tautysdzīsmis (jūs vydā ari Sibira latgalīšu dzīsmis) i 180 vysaidu laiku autoru dzīsmis latgaliski – nu jūs daīmami i vuordi, i nūtis, i ari akordi. Vairs par izdevumu var skaiteit rokstā “Izdūts da ituo apjūmeiguokais latgalīšu dzīšmu kruojums”.

Iz bolvu kategorejā “Pārsteigums” pretendej latgalīšu repere Ūga ar albumu “LG ir HH”. Vaira par albumu var skaiteit rokstā “Repere Ūga izdūd pyrmū solo albumu”.