Roksta autors: portals lakuga.lv

Pasaulī vīneiguo tikai latgaliski saturu veidojūšuo medeja “Latgalīšu kulturys ziņu portals lakuga.lv” darbeibys nūdrūsynuošonai vairuoku mienešu garumā sajimts finansials atbolsts. Leidzekli projektu konkursūs īgiuti nu 2020. gods Latgolys kulturys programys i Medeju atbolsta fonda.

Medeju “Latgalīšu kulturys ziņu portals lakuga.lv” uztur bīdreiba “Latgolys Studetnu centrs”, kura jau daudzus godus eistynoj dažaidus ar latgalīšu volūdys saglobuošonu, atteisteišonu i populariziešonu saisteitus projektus. Portals lakuga.lv sovu darbeibu uzsuoce 2007. godā, tys jūprūjom ir vīneigais medejs, kura saturs teik sagataveits latgalīšu rokstu volūdā – viesturiskā latvīšu volūdys paveidā.

Portala lakuga.lv darbeibys nūdrūsynuošonai tuo eipašnīks kasgods snādz vairuokus projektu dasacejumus dažaidūs konkursūs. Nu 2020. gods maja da gods beigu teik eistynuots projekts “Latgales kultūrtelpa: problēmas, analīze un atspoguļojums portālā lakuga.lv”, kuram leidzekli daškierti nu Latvejis medeju fonda. Rokstu serejuos tiks atspīgeluoti vīdūkli par Latgolys kulturpolitikys i cytim vaicuojumim, latgalīšu volūdys lītuojumu, pieteits Latgolys tāls, par latgalīšim asūšī stereotipi vairuoku desmitgažu garumā, kai ari atkluoti latgalīšu pīredzis stuosti Latvejā i vysā pasaulī.

Sovukuort nu maja da septembra teik eistynuots projekts “Atbolsts latgaliska satura radeišonai portalā lakuga.lv”, kurymā teik sagataveits portala pamatsaturs. Projekts atbaļsteits 2020. gods Latgolys kulturys programā i teik realizāts ar Latgolys regiona atteisteibys agenturys, Vaļsts kulturkapitala fonda i AS “Latvijas valsts meži” finansialu atbolstu.