Rokstu sagatveja: portals lakuga.lv

Izdevnīceiba “Upe tuviem un tāliem” izdavuse ar pīvīnuotū vierteibu i tradicejom pīpiļdeitu albumu par gūdu Sibira latvīšim. Albuma “Sibīrijas dziesmas” mierkis ir raiseit interesi i dūt zynuošonys par latvīšu kulturys daļu, kas leidz šam bejuse mozuok zynoma. Jaunajā albumā īkļautys ari dzīsmis latgaliski.

Latvīšu diaspora Sibirī ir veiduojusēs nu 19. godu symta suokuma. Pādejūs 30 godu laikā cīši lela uzmaneiba veļteita juos kulturys montuojumam i dzīšmu folklorai. Sibirī skaņ dzīsmis, kas pyrma vaira kai godu symta skaniejušys Vydzemē, Latgolā ci Kūrzemē, bet itūšaļt vairs Latvejā nateik dzīduotys. Diasporys dzīšmu repertuarā ir ari zynomu dzīšmu nadzierdāti varianti.

Itaidu dzīšmu aktualitati, pīruoda pyrma vairuokim godim izdūtais albums “Sventājas dziesmas”. Tymā sakūpuotys Leitovys latvīšu dzīšmis, kas beja regulari dzieržamys ari radejis viļņūs, daudzys nu jūs palykušys popularys i īgivušys sev vītu muzykalajā apritē.

Nu plašuo Sibira cīmūs pīraksteituo materiala albumā “Sibīrijas dziesmas” īkļautys 10 dzīsmis Māra Muktupāvela aranžiejumā. Māris Muktupāvels stuosta, ka albumā ir divys latgaliskuos dzīsmis. Dzīsme “Gotovs beja kara puiseits” pīraksteita Timofejevkā 2004. godā, bet dzīsme ”Atguoja rudens” pīraksteita Malinovkys cīmā 2004. godā.

Albuma tapšonā taipoš pīsadalejušys i apvīneibys “Sventava” dalinīki – Ilga Reizniece, Gatis Gaujenieks, Mārtiņš Linde, etnovokala stila specialistis nu grupys “Saucējas” i jaunys, skaneigu bolsu eipašneicys Kristīnis Karelis vadeibā. Dzīsmē “Ejiet, aitas!” var dzierdēt Jekaterinys Matvejevys bolsu. Juos seņči vēļ dzeivoj Sibirī. Albuma skaņu režisors ir muziks Gints Sola, kurs vysuos dzīsmēs ari īspieliejs gitaru.

Itūšaļt albums ir daīmams vysūs leluokajūs muzykys straumiešonys portalūs, “Sibīrijas dziesmas” var nūpierkt tautys muzykys veikalā “Upe” Reigā i leluokajuos CD i gruomotu tierdznīceibys vītuos Latvejā.