Rokstu sagataveja: portals lakuga.lv

Covid-19 pandemejis i vysaidu īrubežuojumu deļ itūgod daudzys nūtikšonys atsaceļ, tok festivals “Muzykys Skrytuļs” byus, īvārojūt vysys drūšeibys praseibys, informej festivala koordinatore Sanita Pinupe.

Skateituojim i klauseituojim byus daīmama festivala digitaluo verseja, kas ir jauns i unikals rysynuojums “Muzykys Skrytuļa” nūrisē. Taipoš latgalīšu muzyku byus īspieja klauseitīs nu sevkurys pasauļa vītys ar radejis viļņu paleidzeibu.

Pyrmajā digitalajā latgalīšu muzykys festivalā klauseituoji tiks īpazeistynuoti ar kluotīnis festivala dalinīkim, atskaņojūt jaunuos latgalīšu muzykys lobuokuos dzīsmis. Atkareibā nu situacejis i juļa beiguos asūšajom drūšeibys praseibom nalels cylvāku daudzums festivalu varēs klauseitīs kluotīnē. Ka tys nabyus īspiejams, kluotīnē tiksīs viņ organizatori i muziki.

“Muzykys Skrytuļa” organizatori jau niu suoc apzynuot vītys gon Latgolā, gon ari cytur Latvejā i uorzemēs, kuruos ļauds varātu sasapuļcēt i klauseitīs festivalu lobuokā kvalitatē. Tai “Muzykys Skrytuļs” cer pīsaisteit vaira cylvāku i atrast dzierdeigys auss.

Festivala “Muzykys Skrytuļs” mierkis ir popularizēt Latgolys kulturys identitati, dūt atbolstu jaunim autorim i izpiļdeituojim, sekmēt dzīšmu izpiļdeišonu i tekstu raksteišonu latgalīšu volūdā. Tīšsaistis festivala-koncerta sajiutu plānuots nūdūt gon tīši – eipaši pīsaistūt klauseituojus i tūs, kas grib baudeit latgalīšu grupu performaņcis, gon ari natīši – sveicynojūt tūs, kas najauši byus īslāguši radejis staceju, pa kuru tiks translāts festivals.

“Muzykys Skrytulī” varēs dzierdēt gon jaunys, gon ari vysaidu popularuos muzykys žanru dzīsmis. Byus ari muokslinīki, kas tīšsaistē reikuos vysaidus konkursus. Festivala organizatore Sanita Pinupe stuosta, ka daudzys grupys jau ir apstyprynuojušys sovu daleibu “Muzykys Skrytulī”. Festivalā izskanēs Kārļa Kazāka, “Latgalīšu Repa”, Aijas Izaks, reperis Ūgys, Ivara Štuba, Arņa Slobožaņina, apvīneibys “Jezups i Muosys” i cytu grupu i muziķu dzīsmis. Pylna festivala programma interesentim varātu byut daīmama tyvuokajā laikā.

Leidz šam tyka sagataveiti naleli videoklipi ar intervejom i Latgolys skotim, dejom i performaņcem, kurus īkļaus i paruodeis festivala digitaluos versejis īrokstā. “Muzykys Skrytuļs” tīšsaistē nūtiks 25. julī – laikā, kod tyka plānuots pats festivals.

Itūgod festivals “Muzykys Skrytuļs” nūtiks jau ostoitū reizi, tok pats pyrmais festivals nūtyka tuolajā 2005. godā ar mierki popularizēt latgalīšu dzīšmu kulturu i latgaliskū identitati.

Ostoitais latgalīšu muzykys festivals “Muzykys Skrytuļs” teik realizāts ar Latgolys regiona atteisteibys agenturys, Vaļsts Kulturkapitala fonda i A/S Latvijas vaļsts meži finansialu atbolstu. Festivalu tradicionali reikoj festivala iniciatoru grupa i Daugovpiļs nūvoda Leiksnys pogosta puorvaļde.