Rokstu sagataveja: portals lakuga.lv

Pīktdiņ, 5. junī, Latvejis Banka izlaiss 2 eiro pīminis monetu “Latgales keramika”, līcynoj bankys sātyslopā publicātuo informaceja. Jaunuos pīminis monetys nacionaluos pusis grafiskuo dizaina autore ir muokslineica Gundega Rancāne.

Latgolys keramika ir īkļauta Latvejis kulturys kanonā, i tei veidoj vīnu nu spylgtuokūs Latvejis kulturys zeimu. Jaunajā pīminis monetā it attāluots Latgolai rakstureigais keramikys veiduojums – svečturs. Tautys pūdnīceiba ilgu laiku tykuse izkūpta Latgolā i Kūrzemē, bet tikai Latgolā tei ir sasaglobuojuse cauri laikim i nūdūta nu paaudzis paaudzē, saceits bankys paziņuojumā.

Pīminis monetys nacionaluos pusis grafiskū dizainu veiduojuse muokslineica Gundega Rancāne, sovukuort plastiskuo veiduojuma autors ir Jānis Strupulis. Monetys kūpeiguos pusis autors ir muosklinīks Luks Luikss.

Pīminis monetys nacionalajā pusē ir īkolti uzroksti “LATVIJA”, “LATGALES KERAMIKA”, kai ari izlaisšonys gods. Monetys jūslu taipoš kai vysom cytom Latvejis Republikys 2 eiro apgrūzeibys monetom veidoj uzroksts “DIEVS * SVĒTĪ * LATVIJU *”. Jaunuo moneta ir kolta Leitovā.

“Latgales keramika” itymā godā byus vīneiguo Latvejis Bankys izlaistuo 2 eiro pīminis moneta. Eiro pīminis monetys ir lykumeigs moksuošonys leidzeklis Latvejis Republikā i cytuos eiro zonys vaļstīs.

Jaunū monetu varēs nūpierkt tikai škārsteikla vītnē e-monetas.lv nu 5. juņa 12.00 stuņdem, informej Latvejis Banka. Īguodei jaunuos pīminis monetys byus daīmamys tikai suvenirīsaiņuojumā i apgrūzeibys monetu komplektūs.