Rokstu sagataveja: portals lakuga.lv

Vosorys īsuokumā latgalīšu grupa “Bez PVN” prezentiejuse sovu jaunuokū dzīsmi “Pa 1am”, aicynojūt izviertēt, kas ir svareiguokais, i atmest navajadzeigū.

Par sovu jaunuokū dzīsmi grupa “Bez PVN” soka: “Mes vysi dzeivojam cīši sovdabeigā napuortrauktu puormaiņu i puordūmu laikmatā. Itys gods it seviški sevi ir paruodejs kai trauksmainu i nūtykumim pylnu gon vysā plašajā pasaulī, gon ari tepoš Latvejā i Latgolā. Īsaklausi ari tu itymā puordūmu klusumā, izviertej sev vyssvareiguokuos lītys i atmet vysu līkū nūst. Kotrys beigys i suokums koč kam jaunam. Kotrai īsuoktai lītai koč kod atīs beigys. Tys ir ciklisks process, nu kuo mes navarim izavaireit. Bet mes varim dzeivuot i maksimali izmontuot myusim dūtuos īspiejis.”

Pi videoklipa vizualuos idejis i realizejis struoduoja Viola Lapa i Guntis Rasims. Jaunuos “Bez PVN” dzīsmis “Pa 1am” muzykys i dzīsmis vuordu autors ir grupys dalinīks Jurs Vucāns. Īroksts izdareits studejuos “Hodila Records” i “Reiga”, dzīsmi miksēja Krišjānis Geidāns, māsterēja Kaspars Ansons. 

Grupā “Bez PVN” dorbojās Kristaps Rasims (bolss, elektriskuo gitara), Guntis Rasims (bolss, akustiskuo gitara), Jurs Vucāns (bolss, elektriskuo gitara, samplers), Valdis Vucāns (basa gitara) i Normans Bārbals (bungys).

Dzīsme “Pa 1am” daīmama ar “iTunes” i “Spotify” straumiešonys vītnēs.