Roksta autore: Sintija Augustova, portals lakuga.lv

Igors Trešutins nu Viļakys nūvoda pošvuiceibys ceļā ir apgivs metalkaļšonys muokslu i niu interesentim pīduovoj īspieju piec uorkuortejuo stuovūkļa beigom īpazeit kaļva dorbu kluotīnē.

Kaļvs Igors Trešutins nu Škilbānu ir realiziejs projektu par metalkalieja nūjumis izveidi dzymtajā pusē. Projektu atbaļstejuse Viļakys nūvoda dūme, idejis eistynuošonā ar leidzfinansiejumu pīsadalejs ari pats Igors. Projekta aktivitatēs izveiduota metalkalieja darbneica aba smēde. Apmaklātuojim ir īspieja na tikai apsavērt, kai nūteik metala apstruodis process, bet ari nūpierkt Igora taiseitūs suvenirus.

Igors metalkaļšonys jūmā dorbojās jau 10 godus i pats stuosta, ka juo darbeiba metalkaļšonā aizasuoce aiz nazinis.

“Napatyka muns tūreizejais dorbs, nazynuoju, kū dareit iz prīšku, suoču dūmuot par jaunu, naparaudzeitu nūdarbi i tai atrodu metalkaļšonu. Četrus godus muocejūs, piec tam tikai suoce nazkas saīt,” stuosta Igors.

Amatnīka dorbus var redzēt Viļakā, pīmāram, garuos laternys Viļakys katuoļu bazneicys prīškā ir Igora rūku dorbs. Bolvu regiona kulturviesturis datu bāzē daīmama informaceja par tū, kai Igora dorbi ir sasnāguši ari tagadejū Latvejis prezidentu Egilu Levitu. Viļakys dūmis prīkšsādātuojs Sergejs Maksimovs prezidentam duovynuoja Igora taiseitū svečturi.

Igoram vysvaira pateik nu metala kaļt pyuču (pūķu), uožu i suņu golvys. Dorbs ir juoizdora precizi, tys ir smolks i sarežgeits, bet tys Igoram saguodoj vysvaira prīcys. “Pats gryutuokais metalkaļšonys dorbā ir ideju i fantazejis tryukums,” stuosta Igors. “Nu cytys pusis, fiziskais dorbs ir gryuts, bet pi tuo var pīrast.”

Metalkaliejs atzeist, ka vaira par pīcom stuņdem atsarast darbneicā jis navar – tryukst energejis. Koč i dorba dīna smēdē ir saleidzynūši eisa, smogais dorbs pajam vysus amatnīka spākus.

Vysim tim, kas grib paraudzeit sevi metalkaļšonys jūmā, Igors īsoka nūteikti paraudzeit, bet nadaspīst sevi tū dareit puori spākim, i vielej iztureibu.

Interesentim ir īspieja gastēt meistara darbneicā Škilbānūs i īpazeit kaļva omota viesturi i nūzeimi myusu dīnuos.