Roksta autore: Sintija Augustova, portals lakuga.lv

Tūs cylvāku, kas nadzeivoj Latgolā i kuru saknis nav nu itenis, vydā nareši ir pastuoviejs prīkšstots, ka Latgola i latgalīši atsaškir nu cytu Latvejis nūvodu īdzeivuotuoju. Lai izzynuotu, kaidys ir nalatgalīšu dūmys par Latgolu i latgalīšim, portals lakuga.lv lyudze treis jaunītem pasadaleit ar sovim prīkšstotim.

Kas ir latgalīts i kū jis ād?

Vuordineicuos i zynuotniskuos publikacejuos var atrast vysaidys definecejis, kas teik saprosts ar jiedzīni “latgalīts”, tok kotra poša prīkšstots i asociacejis itam vuordam var byut atškireigys nu gruomotuos raksteituo. Studente Rūta nu Valkys iz vaicuojumu, kas ir latgalīts, atsoka: “Latgalīts ir Latvejis īdzeivuotuojs, Latgolys īdzeivuotuojs ar izteiktu pīdereibu sovai specifiskajai kūpīnai, grupai.” Sovukuort Helēna, kas dzeivoj Piņķūs, natuoli nu Reigys soka: “Munupruot, latgalīts ir cylvāks, kurs dzeivoj kaidā nu Latgolys piļsātu.”

Studente Viktorija, kura īt nu Līpuojis par latgalīšim soka: “Munupruot, latgalīts vinmār ir atsaškirs nu latvīšu, varbyut pi vainis ir mentalitate. Latgalīši maņ saistuos ar darbeigom bitem. Ka īpazeistu latgalīti, tod zynu, ka byus ceņteigs i darbeigs.”

Dažaidūs turisma bukletūs teik aktivi reklamāts Latgolys kulinarais montuojums. A kaidi ir jaunīši prīkšstoti, par tū, kū latgalīši ād? Rūtai i Viktorijai pyrmuo asociaceja ir buļbis. “Vysi latvīši zyna, kas ir buļbis, i zyna, ka vuords “buļbe” īt nu Latgolys,” uzsver Viktorija. “Latgalīts, kai sevkurs latvīts, ād parostu iedīni. Pyrmais, kū īsadūmoju, ir sutynuoti kuopusti, kuopustu zupa, galis i uobeļu peirāgi – sātā taiseits iedīņs,” sovūs prīkšstotūs doluos Helēna.

Ar kū saistuos Latgola?

Vaicojūt, kaidys asociacejis rūnās, dūmojūt par Latgolu, Helēna soka: “Pyrmais, kas īt pruotā, kod dzieržu vuordu “Latgola”, ir Daugovpiļs.Maņ tei līkās taida eistyna latgalīšu piļsāta. Vēļ Latgola asociej ar latgalīšu voludu i smukū dobu. I tradicejom, latgalīšu dzīsmem, kinom, eipaši kinu “Cilvēka bērns”, i Boņuku.” Leidzeigi prīkšsoti ir ari Rūtai, ari jai Latgola saistuos ar cīši boguoteigu kulturu i dobu.

Sovukuort Viktorijai pyrmais, kas īt pruotā, dūmojūt par Latgolu, ir daudzī azari, cylvāki, kas pļaun zuoli ar izkapti: “Tys ir pyrmais, ar kū asocieju Latgolys nūvodu. Pi myusim, Līpuojā, naasmu pamanejuse, kab pļautu zuoli ar izkapti, bet munys sātys pogolmā (red. pīz.: Viktorija dzeivoj daudzdzeivūkļu sātā) nazkod ganejuos gūvis.”

Atškireibys nu cytu Latvejis nūvodu

Iz vaicuojumu, voi i ar kū Latgola atsaškir nu cytu Latvejis nūvodu, studente Ruta atsoka: “Latgola nu cytu nūvodu atsaškir ar sovu volūdu, specifiskū kulturu, ar tū, ka rūbežojās ar cytom vaļstim. Latgola atsaškir veļ ar tū, ka tei vīnkuorši ir Latgola. Cylvākūs, kas nuok nu Latgolys, ir kas taids, kū navar apraksteit, nazkas taids, kuo nav nikur cytur.” Ari Helēna, kai vīnu nu atškireibu miņ latgalīšu volūdu i tradicejis. “Maņ līkās, ka Latgolā ir cīši forši, komunikabli, atraktivi i atvārti cylvāki. Kūpumā Latgola maņ asociej ar nazkū pozitivu,” pībylst jaunīte.

“Latgolā ir daudz taidu nianšu, kas ir tikai Latgolā. Latgalīši cīši izjiut pīdereibu sovam nūvodam.

Kūrzemnīkam nav tik interesanti byut par kūrzemnīku kai latgalīšam ir byut par latgalīti.

Latgola varātu byut tyva Krīvejai gon mentalitatis, gon ari volūdys ziņā. Es kai kūrzemneica eisti napuorzynu Latgolys pusi, leidz ar tū līkās, ka tī varātu byut lela Krīvejis ītekme. Latgalīšu volūda ir leidzeiga lītuvīšu i krīvu volūdys sajaukumam,” sovūs prīkšstatūs par Latgolu i latgalīšim doluos Viktorija.