Rokstu sagataveja: portals lakuga.lv

15. augustā nu 11.00 leidz 19.00 stuņdem Vacreigā, Jākuba laukumā, jau septeitū godu nūtiks pasuokums “Latgales diena Rīgā”. Tuo ītvorūs Reigys īdzeivuotuoji i piļsātys gosti varēs īsapazeit ar Latgolys kulturu i tradicejom.

Latgolys plānuošonys regions sadarbeibā ar Latgolys pošvaļdeibom i Latgolys tematiskajim cīmim jau septeitū reizi reikoj nūtikšonu “Latgales diena Rīgā”. Pasuokumā varēs vāruot gon pūdnīku dorbuošonūs ar muolu, audieju auššonu stuovūs, kaļva dorbu smēdē, pinieju prasmis kliudzeņu škeļšonā i peišonā.

Varēs ari nūpierkt omota meistaru izstruoduojumus i nūgaršuot Latgolys delikatesis – iz kļovu lopom captu rupmaizi, sātys dasys i špeku, sātys veinu, olu, zuoļu čajis i zupu nu leluo saimis kotla.

Latgolys dīnā Reigā varēs dzierdēt ari latgalīšu volūdu. Ar nūtikšonys gostim latgaliski runuos TV raidejumu vadeituojs Oskars Bērziņš. Taipoš varēs klauseitīs latgalīšu muzyku i doncuot tai leidza.

Iz nūtikšonu aicynuoti ari bārni. Vysys dīnys garumā varēs dasadaleit vysaiduos radūšajuos darbneicuos.

Sevkuram interesentam byus īspieja pasakonsultēt ari ar turisma i informacejis centru specialistim, pi Latgolys plānuošonys regiona darbinīkim varēs uzzynuot par uzjiemiejdarbeibys i reemigracejis īspejom Latgolā.

Nūtikšonys beiguos vysi Latgolys dīnys gosti varēs sasadzīduot kūpdzīsmē “Pi Dīveņa gari goldi”.