Roksta autors: Vineta Vilcāne, portals lakuga.lv

Latgolys viesturis pietnīki i aizrauteiguokī entuziasti nūteikti ir pazeistami ar škārsteikla vītni “Latgales dati”. Tymā publicāta informaceja par tyukstušom nūtikšonu Latgolā i cylvākim, kuru dzeivis bejušys saisteitys ar Latgolu. Datu bāzis aizsuokumi meklejami jau 20. g.s. 80. godu beiguos, kod tuos veiduotuojam, viesturnīkam Henriham Somam beja vareiba īsapazeit ar da tam aizlīgtū latgalīšu presi.

Vyss sauocēs ar papeira kartoteku

“Atmūdys laikā, 80. godu beiguos, kod P. Stučkys Latvejis Vaļsts Universitatē (red. pīz. – niu Latvejis Universitate) studieju viesturi doktoranturā, tyka atvārti viesturis olūti, i paraleli doktora dorbam suoču intensivi skaiteit latgalīšu presi. Maņ tys beja lels atkluojums, jo universitatē par Latgolys viesturi nikuo nastuosteja, tys vyss beja jaunums. Suokumā es izveiduoju papeira kartoteku, raksteju iz taidom pošom lapeņom, kaidys izmontuoja bibliotekuos. Es raksteju par nūtykumim, viesturis periodim, eipaši par cylvākim, jo nabeja informacejis, kas jī taidi ir. Maņ izaveiduoja divys atvilknis ar kartoteku,” par datu bazis latgalesdati.du.lv aizsuokimim stuosta tuos administrators, viesturnīks Henrihs Soms.

Pamozom sekuoja kartotekys digitalizaceja. Struodojūt Daugovpiļs Universitatē, Henrihs 90. godu suokuos satyka dūmubīdrus, kuri puorzynuoja datortehnologejis i kurim interesēja Latgolys viesture, jī īsaceja kartoteku digitalizēt. Henrihs atguodoj ari tū breidi, kod jis izdūmuoja datu bāzis nūsaukumu “Latgales dati”. Tys nūtis 1993. godā, rūkūt guļbys tāva saimnīceibā.

Datu bāzis pyrmuo digitaluo verseja bejuse cīši sarežgeita, tys vēļ beja laiks, kod tei beja daīmama tikai nu konkretim datorim. Tys beja laiks pyrma škārsteikla.

Nu 1995. leidz 1999. godam tyka izdūtys nalela formata gruomotys “Latgales fakti un dati”, kuramuos publicēja informaceju par saistūšim regiona viesturis nūtykumim. “Tod vēļ nabeja škārsteikla i cytu programu, i lykuos, ka tys vyss iz papeira juolīk, piec tam roduos dūma, ka informaceja varātu byut ari škārsteiklā,” soka H. Soms. Datu bāzis škārsteikla verseja suoce dorbuotīs 2008. godā.

Nūtykumim i personeibom juobyun saisteitom ar Latgolu

Datu bāzē “Latgales dati” itūšaļt daīmama informaceja par vaira nikai septeņom tyukstušom nūtykumu i vīnpadsmit tyukstušom personeibu. Īspaideigs ir ari fotografeju kruojums – tyvai pi sešom tyukstušom. Personeibys vītnē var atrast piec uzvuorda, sovukuort nūtikšonys piec datumim.

Itys bezmoksys resurss ir cīši nūdereigs dzymtys viesturis pietnīkim, i, prūtams, ari nūvodpietnīkim.

Zinis daīmamys par personeibom i nūtikšonom nu vysaidu viesturis pūsmu. Kab informaceju par kaidu cylvāku ci nūtikšonu īkļautu datu bazē, juobyun saisteibai ar Latgolu, pīmāram, cylvākam juobyun dzymušam voi myrušam Latgolā, jis var byut ari vuicejīs, struoduojs Latgolā voi ari palics slovons, voi ari juo darbeiba ir ītekmiejuse Latgolys viesturi. Kai nūruoda H. Soms, saisteiba ar Latgolu var byut ari nagativa. Attīceibā iz personeibom vēļ ir svareigi, kab par konkretū cylvāku byutu bejuse ci vēļ jūprūjom ir interese sabīdreibā, i zinis par jū pasaruodeitu viesturis olūtūs, pīmāram, presē. Leidzeigi ir ar viesturis nūtykumim, tūs datu bāzē īkļaun, ka iz tim ir atsauce olūtūs.

“Latgales datu” papyldynuošona Henriham ir hobejs, i kotra dīna atnasūt jaunus atkluojumus. Jis datu bāzis papyldynuošonai pīīt cīši cīteigi, regulari īsapazeistūt ar jaunuokū literaturu i cytim resursim par Latgolu, i tikleidz atkluoj kaidu jaunu informaceju, tai tū publicej.

Datu bāzis papyldynuošonā H. Soms pīsaista ari Daugovpiļs Universitatis studentus, kurim studeju kursu ītvorūs dūd itū aizdavumu. Daudzi juo studenti sovus studeju dorbus roksta par dažaidom Latgolys viesturis temom i pietejumu gaitā teik atkluoti jaun fakti i apzynuotys Latgolys viesturē zeimeigys personeibys, ar studentu vierteigajim atkluojumim teik papyldynuota datu bāze.

Cikom datu bāzis uzturiešona ir vaira kai breivpruoteigais dorbs, tok H. Soms rauga tuos atteisteibai pīsaisteit finansiejuma. Vīnu nu tyvuokūs īceru asūt modernizēt sātyslopys dizainu. Asūt ari īcere datu bāzē vaira īkļaut olūtus i tūs sasaisteit dokumentu kruojumim i cytim viesturis resursim.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.