Roksta autors: portals lakuga.lv

Dīnys gaismu īraudzejuse Jōņa Cybuļska saraksteituo biografeja par dzīsminīku i latgalīšu rūkroksta gruomatnīceibys puorstuovi Andryvu Jūrdžu, kuram itūgod teik atzeimuots 175. jubilejs. Izdavums ir eipašs ar tū, ka tys izdūts divejuos volūduos – latgalīšu i angļu. Gruomotys izdūšonu iniciejs uzjiemiejs i Latvejis gūda konsuls Teksasys pavaļstī Pīters Aloizs Ragaušs.

Andryvs Jūrdžs (1845–1925) ir vīns nu nūzeimeiguokūs i zynomuokūs Latgolys nacionaluos atmūdys dalinīku. Andryvs bejs cīši apduovynuots, pošvuiceibys ceļā apgivs vairuokys svešvolūdys, kas cīši nūderēja, tulkojūt dažaidus materialus i padūmus latgaliski, puorrakstejs Svātūs Rokstus, pīrakstejs sokamvuordus, tautysdzīsmis, nūvāruojumus, kai ari rakstejs originaldzejūļus. A. Jūrdža ar rūku skolu gaismā pīraksteituos gruomotys beja pat ap tyukstuš lopu bīzys, tuos tyka izplateitys vītejūs ļaužu vydā. Drukys aizlīguma godūs tom beja lela nūzeime Latgolys latvīšu izgleituošonā, jo gruomotu īspīsšona latgaliski tūreizejā Vitebskys guberņā beja aizlīgta.

Gruomotys autoru Jōni Cybuļski (1911–1997) i Andryvu Jūrdžu vīnoj radnīceigys saitis – Jōņs ir Andryva mozdāls i bejs ari dzymtys rakstnīceibys tradiceju turpynuotuojs. Gruomotys “Andryvs Jūrdžs” izdūšonu iniciiejs i finansiali atbaļstejs ASV dzeivojūšais uzjiemiejs i mecenats Pīters Aloizs Ragaušs, kas ari ir pīdereigs Jūrdžu dzymtai.

“Pyrms vairuokim godim Latvejis Nacionalajā bibliotekā es uzguoju muna vactāva Viktora bruoļa saraksteitū manuskriptu par Andryvu Jūrdžu. Skaiteju par sovu miseju tū izdūt gruomotā, jo manuskripts bibliotekā beja globuojīs jau daudzus godus. Lela daļa myusu dzymtys dzeivoj uorpus Latvejis, dīvamžāl naprūt latgalīšu volūdu, partū beja svareigi gruomotu iztulkuot angļu volūdā,” soka Ragaušs.

Itei ir jau ūtruo J. Cybuļska gruomota, kas daīmama uorvaļstu auditorejai. 2019. godā latgalīšu i angļu volūdā tyka izdūtys juo puordūmys gruomotā “Veritas nostra est. Patīseiba ir myusu”.

J. Cybuļska gruomota “Andryvs Jūrdžs” atkluoj na tikai izcyluo latgalīša i juo saimis lūcekļu dzeivis gaitys, bet ari snādz īskotu tuo laika Latgolys sociali politiskajā dzeivē.

Bilingvalū gruomotu izdavuse Latgolys Kulturys centra izdevnīceiba, nu latgalīšu volūdys iz angļu volūdu iztulkuojuse Aija Nagle-Īzaka.

Gruomotys prezentaceja nūtiks 4. septembrī Rēzeknis nūvoda Rogovkā Andryva Jūrdža 175 godu jubilejam veļteitajā pasuokumā. Tū tīšraidē varēs vērtīs portala lakuga.lv Facebook kontā.

Jōņa Cybuļska gruomotu “Andryvs Jūrdžs” var nūpierkt škārsteikla veikalā taiseitslatgola.lv, veikalā “oMarta” Daugovpilī, kai ari gruomota byus nūpierkama Preiļūs veikalā “Dekor A”, Rēzeknē veikalā “Liesma”, “Zvaigzne ABC” i “Jānis Roze” gruomotneicuos Reigā.