Rokstu sagataveja: portals lakuga.lv

Itūrudiņ gaidoms latgalīšu popa-roka grupys “Dabasu durovys” pīktais albums “Perimetrs”. Tymā byus 10 dzīsmis, kurys leluokūtīs saraksteitys karantinys laikā. Jaunais albums byus bilingvals – latgalīšu i latvīšu literarajā volūdā, i tiks izdūts vinila platis formatā, kai ari byus daīmams digitalā formatā.

Grupa sovus fanus īprīcynuojuse, pīduovojūt bez moksys lejupīluodēt vysu “Dabasu durovu” diskografeju i cytus albumus, kuru topšonā leidzdorbuojīs tuos liders Arņs Slobožanins. Albumi daīmami failiem.lv/dabasudurovys. Kai ari itamā lopā sevkurs var finansiāli atbaļsteit grupu, spīžūt iz pūgys “Atbalstīt”.  

Sovukuort portals lakuga.lv apkūpuojs deveņus interesantus faktus par grupys leidzšinejū darbeibu.

1. Pyrmuo grupys nūspālātuo dzīsme ir “Bezpruotā”

“Dabasu durovys” sovu pyrmū koncertu nūspēlēja 2006. gods martā, i pyrmuo grupys publiski izpiļdeituo dzīsme beja “Bezpruotā”. Vāluok itei dzīsme tyka īkļauta pyrmajā latgalīšu muzykys izlasē “As ar čiulim nadoncoju!”.

2. Grupys sastuovā spieliejs vaira kai pussymts cylvāku

Pa itim vysim godim “Dabasu durovu” sastuovā paspiejuši paspēlēt 56 cylvāki. Vysmoz itaidu skaitu atguodoj grupys liders Arņs Slobožanins, pībylstūt, ka skaitlis varātu byut ari leluoks, kaids mož asūt damiersts.

3. Dzīsmis tykušs dzīšmu aptaujis “Muzikālā banka” finalā

“Dabasu durovu” dzīsmis divejys reizis ir tykušys “Muzikālās bankas” finalā. 2015. godā grupa finalā tyka ar dzīsmi “Sejas grāmata”, bet 2016. godā ar dzīsmi “Šūpuļdziesma”.

4. Grupys vystuoļuokais koncerts Australejā

Geografiski vystuoļuok nu Latgolys snāgtais koncerts beja 2011. godā Normanvillā, Australejā. “Dabasu durovys” pīsadaleja Australejis latvīšu 33. Jaunatnis dīnuos.

5. Vysvaira aranžātuo dzīsme ir “Pusnakts triadis”

Nu vysu “Dabasu durovus” dzīšmu vysvaira aranžeju bejs dzīsmei “Pusnakts triadis”. Tai ir verseja kuora, bigbenda, steigu kvarteta i pyutieju orkestra aranžiejumā.

6. Vysilguokuo sadarbeiba grupai ir ar skonu inžineri Armandu Treilihu

Grupai sadarbeiba ar skonu inžineri Armandu Treilihu, kas dorbojās grupuos “Rakstu raksti” i “Autobuss Debesīs”, ir jau nu 2006. gods. Pa itim godim Armands ir samiksiejs kūpā vaira kai 60 grupys dzīsmis.

7. Nu suoku “Dabasu durovys” dzīsmis izpiļdeja tikai latgaliski

Sovys darbeibys suokumā “Dabasu durovys” dzīsmis izpiļdeja tikai latgaliski, bet 2011. godā piec grupys gitarista Romāna Sladža īrūsynuojuma tyka radeita pyrmuo dzīsme latvīšu literarajā volūdā. Tei  beja “Grēku Fani”.

Grupai ir ari pa vīnai dzīsmei krīviski i angliski –“Seti” i “White”.

8. Grupa vairuokys reizis pīdzeivuojuse avarejis

“Dabasu durovu” koncertdzeive nav iztykuse ari bez kuriozu, čudnu i pat traumatisku atgadejumu. Tai, pīmāram, basgitarists Sergejs pyrma kaida koncerta Brīžucīmā īkryta pašalē, sasyta rūku i navarēja paspēlēt. Juo vītā koncertā basu raudzeja spēlēt šofers. Kaidā cytā reizē piec naizskaidrojamom, styprom suopem kryutīs koncertu Baļtinovys vydsškolā navarēja snēgt bundzinīks Juoņs. Jam paleidzēja vītejuos medmuosys šprice, i koncerts tyka gūdam snāgts. Piec 1. apreļa koncerta Baļtinovā grupa tyka avarejā pi Maltys – autobuss nūsleidēja nu ceļa i ībrauce gruovī. Tymā pat zīmā grupys autobuss beja īstidzs dubļūs pi Rimicānu cīma, daguoja saukt traktori. Taipat ari grupys buss beja nūkriejs nu ceļa pi Jersikys. Tūreiz traktoru, kas tū izvylka, sarunuoja Jersikys pamotškolys direktore.

9. Albumus izdūd rudinī

Da šam “Dabasu durovys” izlaidušys četrus albumus – “Lepetnīks” (2008), “Styklu vītā skaņa” (2012), “Bāka” (2014) i “Pādys runoj” (2016). Tī vysi izguojuši rudinī.  Ari pīktū albumu “Perimetrs” grupa klauseituoju viertiejumam nūdūs ituo gods rudinī.