Roksta autore: Vineta Vilcāne, portals lakuga.lv

Taipus okeanam Bostonā dzeivojūšuos flautistis, pedagogis i komponistis Ilonys Kudinis vuords džeza muzykys meiļuotuojim ASV i Latvejā nav svešs. Pyrma 20 godu vēļme pylnveiduot sevi taišni itymā muzykys žanrā jū nūvede iz Bostonu.

Saikne ar muzyku jau nu bierneibys

Ilonu muzykā īvadeja juos tāvs Ontons Kudiņš, kurs beja muzykys školuotuojs Špogūs i vāluok Daugovpilī. “Jis beja pyrmais, kas īvuiceja spēlēt klavīris, dzīduot. Atguodoju, kai es Špoģūs pi Zīmyssvātku egleitis atskaņuoju sovu pyrmū dzīsmeņu,” sovuos atmiņos doluos Ilona.

Kod Ilonai beja deveni godi, juos saime puorsacēle iz Daugovpili, i jei suoce vuiceitīs tīnis muzykys školā. “Padūmu laikūs beja cīši stryktai, ka tev ir deveni godi i gribi vuiceitīs spēlēt klavīris, tod tys ir par vālu. Muzykys škola vaira napīduovuoja vejūli i klavīris, jo tuos beja juosuoc vuiceitīs spēlēt nu četru pīcu godu. Maņ beja izvēle storp flautu i čellu. Pasavieru, ka čells taids lels, bet flauteņa taida mozeņa kasteite, nav tik gryuši nosuot, par tū izavielieju flautu, i niu tei ir daļa nu munys dzeivis,” soka muzike. Nasaverūt iz tū, ka par Ilonys pamatinstrumentu palyka flauta, augstā leiminī tyka apgiuta ari klavīrspēle. “Maņ klavrīspēle cīši paleidz, tu dūmoj plašuok, dūmoj par kompoziceju. Asu cīši pateiceiga sovai klavīrškoluotuojai,” soka Ilona. Sarunys gaitā jei vairuokkuort uzsver, cik pateiceiga ir Daugovpiļs muzykys školai par lobajim pamatim.

Nu dzeivis perioda Daugovpilī eipašys atminis Ilonai saistuos ar vokali instrumentalū ansambli “Daugaviņa”. “Mes kotrys spēlējem vysmoz pīcus instrumentus, mes vysi dzīduojem, uzastuojem vysā Padūmju Savīneibā. Tymā ansamblī dorbuojēs ari Ilona Bagele,” sovu bierneibu atguodoj muzike.

Kaisleiba pret muzyku nūvad iz ASV

1991. godā Ilona īsastuoja J. Vītola Latvejis Muzykys akademejā. Jai beja interese par improvizaceju i džeza muzyku, tok tūlaik tū navarēja studēt akademejā, i vīneiguo īspieja beja vuiceitīs uorpus Latvejis, kū Ilona ari izmontuoja, 2001. godā nūbraucūt iz Bostonu ASV. “Es aizbrauču iz nūsaklauseišonu Helsinkūs, maņ daškēre finansis i es aizbrauču vuiceitīs iz Bostonu. Izgleiteiba beja tei, kas mani vadeja. Muni obeji vacuoki ir školuotuoji, i tāvs vysod saceja – izgleiteiba, izgleiteiba i vēļreiz izgleiteiba,” soka Ilona.

Piečuok Ilona nūlēme turpynuot sovu profesionalū karjeru taipus okeana, tok nazaudejūt saikni ar Latveju i tenis muzykys dzeivi. Flautiste Ilona Kudiņa Latvejā uzastuojuse vairuokkuort – pārņ Latvejis Nacionaluos bibliotekys symtgadis svineibu kamermuzykys i džeza improvizacejis kocertā, taipoš Saulkrastu džeza festivalā, kai ari cytūs koncertūs.

Asūt ASV, Ilona ir īrakstejuse treis albumus, nu kuru albumā “On the Bridge” (“Iz tylta”, 2006) īkļauti latvīšu komponistu dorbi. Jei ari organiziejuse daudzus koncertus, i kai soka Ilona poša: “Ir daudz organizāts, es nabeju tei, kas sēdēja i gaideja, kod pīness īspiejis, es uzajiemu vadeibu i atbiļdeibu.”

Sovulaik jei ari aktivi īsasaisteja Bostonys latvīšu kūpīnys aktivitatēs, tok niu paguojuse molā. “Maņ cīši patyka atskaņuot latvīšu muzyku, Latgolys komponistu muzyku. Tys beja šmuks laiks, bet saprotu, ka ir lītys, kas ir izsmaltys, i vajag atīt nu tuo, i vajag jaunys “batarejis”,” soka Ilona. Jei ari ir drūsa, ka Amerikys latvīšu kūpīnuos napagaiss latviskuo kultura i volūda, koč ari vacuokuos paaudzis vydā ir taidys bažys. “Lītys atsateista, ir jaunuokuo paaudze, kas atīt ar sovom idejom. Niu ir pandemeja, bet ar tū vysu cylvāki ir rodūši, izdūmoj vysaidys interneta dzelys. Dūmoju, ka tys byus, tys nikur napaliks, i tuos organizacejis, kas ir ite, ir spieceigys, ar ilgom tradicejom,” soka Ilona.

Latgolys zemeņu smuords

Sarunā ar Ilonu var just, cik jai nūzeimeiga ir Latgola. “Maņ Latgola ir bierneiba. Tys ir meža zemeņu smuords, muna vacmamma, muna paguotnis dzeive. Pyrms puorsacēlem iz Daugovpili, dzeivuojom Višķūs, bet pyrms tam es dzeivuoju pi vacmamenis Treikaniškūs, kas ir aiz Kruoslovys mežā.

Kod asmu Latvejā, nūīreju mašynu i braucu iz Latgolu. Beju GORĀ, beju vīnkuorši mežā i elpuoju svaigu gaisu, beju aizbraukuse iz Špogim, izstaiguoju bierneibys vītys. Pa itim 20 godim vyss ir mainejīs. Muna saikne ir koč kaids muns īdūmu pasauļs, i maņ pateik braukt atpakaļ, es niu asmu kai turists,” puordūmuos doluos Ilona.

Vaicojūt, voi saīt sekuot leidza latgaliskuos kulturys aktualitatem, Ilona atsoka: “Es tam pīvieršu uzmaneibu. Facebook cīši aktivs ir Teksasā dzeivojūšais Pīters Aloizs Ragaušs, jis ir dedzeigs Latgolys kulturys atbaļsteituojs, i jis mani “aizdadzynuoja” lobā nūzeimē, i, pasasokūt jam, suoču vaira sekuot latgaliskajom aktivitatem. Pīsavīnuoju Facebook grupai “Latgalians”, radzūt, kas nūteik, asmu cīši īspaiduota, jo munā laikā tys beja sovaižuok. Es ari jiutu, ka daudz kuo nazynu. Grybu nūsavērt filmu “Piļsāta pi upis”. Cerieju nūsavērt itamā vosorā Latvejā, bet pandemejis deļ nikur nabrauču, maņ pat beja bilete nūpierkta. Maņ ir interese puorskaiteit kaidu gruomotu. Man ir cīši lels lapnums par sovu nūvodu.”

Īvest muzykys pasaulī

Ilona Kudiņa ir na tikai profesionala muzike, bet ari pedagoge. Sovys zynuošonys i prasmis jei nūdūd na viņ sovim audzieknim ASV, bet ari Latvejā – bejuse vīsprofesore J. Vītola Latvejis Muzykys akademejā, vadejuse meistarklasis jaunajim muzikim i c.

Pandemejis laiks īvīss sovys korekcejis ari juos pedagogis dorbā, i, kai stuosta Ilona, nuokušajā vuiceibu godā nūdarbeibys nūtikšūt attuolynuotai: “Turpynojam struoduot “kasteitēs”, bet ir vaira laika paskaiteit gruomotys, padūmuot dziļuok, puorvērtēt lītys.”

Kai atzeist Ilona, jei kai pedagoge izjiutūt cīši lelu atbiļdeibu pret sovim audzieknim: “Muns dorbs, kai pasnīdziejai nav saceit, kai tev dzeivuot, muns dorbs ir saceit – te ir tys muzykys pasauļs, te ir tik daudz dažaidu “rūtaļlītu”, paruodeit itū pasauli i īdvesmuot. Kod suocu vuiceit piļneigu īsuocieju, jiutu miļzeigu atbiļdeibu, jo nu mane ir atkareigs, kai jis pret muzyku atsatīks vysu atlykušū dzeivi. Var īsuokt tai, ka pamess piec treis stuņdem. Tys ir cīši sarežgeiti, bet maņ perosneigi pateik.”

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.