Roksta autore: Sintija Augustova, portals lakuga.lv

Grupa “Laiksne” izveiduota 1993. godā Reigā. Tuos nūsaukums ir jimts nu apvydvuorda “laiksne”, kas Austrumlatvejā apzeimej iudiņsrūzi. “Laiksnis” repertuarā ir postfolklorys dzīsmis, Latgolys tradicionaluos sīvīšu, tolku i vedeibu aba kuozu dzīsmis. Augusta beiguos grupa pīduovuoja ari singlu “Dzīžu, dzīžu vīna pati”.

Kolektiva “Laiksne” puorstuove i vadeituoja Baiba Indrēvica stuosta, ka agruok mieginuojumi nūtykuši Reigys Tautys dailomotu pamatškolā, tī saguojs sasatikt ar breineigim cylvākim, kūkļu meistarim, lobim dzīduotuojim. “Godu nūspēlējom, daudzys lītys īsavuicejom, bet tod paskrējom kotrys iz sovu pusi. Myusim beja divejys īspiejis – voi ļaut kolektivam sajukt pavysam, voi puorjimt tuo vadeibu. Tai kai myusim cīši patyka kūpeigi muzicēt sovam prīkam i veseleibai, nūlēmem par lobu ūtrajam variantam,” soka Baiba. Agruok grupu vadeja Māra Taivane i Māreite Ose – obejis ari kolektivu dybynuoja. Niu kolektiva vadeituoja ir Baiba Indrēvica.

Dzīsmis grupys repertuaram meklejamys Latgolā. Gon melodejis, gon ari tekstus dzīsmem dalinīki meklej folklorys i ekspediceju materialūs. “Mes vysi asam sasatykuši Reigā, nivīns nu myusu nav nu Latgolys, bet Latgolā ir smukys dzīsmis, myusim tuos cīši pateik, deļtam mes tuos ari dzīžam latgaliski,” dzīšmu i volūdys izvēli skaidroj niulinejuo kolektiva vadeituoja.

Grupā regulari muzicej Lauma Garkalne, Dina Liepa, Vineta Romāne, Baiba Indrēvica, Imanta Nīgale, Kaspars Indrēvics i Gatis Gaujenieks. Godu gaitā sastuovs ir pasamainejs. Kolektiva vadeituoja stuosta, ka puiši, kas ir jūs kolektivā, kasdīnā ar jim kūpā namieginoj, bet gon paleidz ar tehniskom lītom, ar padūmu i vysaiž cytaiž atbolsta. 

“Laiksnis” dalinīki spēlej vairuokus muzykys instrumentus, tymā skaitā kūklis, vejūlis, akordeonu, mandolinu, vysaidus grabuļus i cytus. Taipoš kolektiva “Laiksne” dalinīki ari kotrys atseviški dorbojās Latvejis folklorys dzeivē, dasadola vysaiduos nūmetnēs, projektūs, festivalūs i skaņu īrokstu topšonā.

Vysvaira kolektivam atmiņā palykuši kūpegī braucīni, pīmāram, braucīņs iz Eiropys raidstaceju apvīneibys radiofestivalu Slovenejā. “Tys beja pyrmais lelais braucīņs, kurā īsapazynom ar daudzom jaunom grupom, tymā skaitā vairuokom grupom nu Pūlejis. Piec tam asam gastejuši Pūlejā, Australejā,” ar atmiņom doluos Baiba.

Kolektivs “Laiksne” ir izdevs pīcus studejis albumus – “Es čigāna meita biju”, “Putra”, “Es jauna būdama”, “Jāņu nakti zelta rasa” i “Kyukova dzegyuze”. Grupys albums “Putra” beja vīns nu nominantu 2010. gods Latvejis Muzykys īrokstu gods bolvā “Zelta Mikrofons” kategorejā “Labākais tautas mūzikas albums”. “Mes aizīmam iz pasuokumu i redzim lobuokūs, kas ir bejuši Latvejis muzykā tymā godā, radzom ari sevi. Cīši prīcojomīs par sasnīgumim,“ aizrauteigi stuosta Baiba. Albumā “Putra” īkļautys savīseigys dzīsmis nu vysaidu Latvejis pogostu, ari nu Sukinavys latvīšu kolonejis Sibirī.

Niu “Laiksne” klauseituojim gatavej jau sastū albumu. Tok tuo topšonys process īt iz prīkšu pamozom. “Mes vysi asam ar saimem, dažom ir mozi bārni, deļtam īrokstu process ir lānuoks,” tai Baiba. Jaunajā albumā byus apkūpuotys dzīsmis par cylvāka dzeivis rytumu – suocūt ar bārnu dzimšonu, jauneibys dīnom, pīaugšonu, īīšonu preceibu laukā. “Albumu plānojam izdūt tod, kod tys byus gotovs,” smejās Baiba. “Daudz kas atkareigs ari nu Covid-19 situacejis i apstuokļu. Īroksti nūteikti īt jau iz beigu pusi, puorejais atkareigs nu skaņu īrokstu studejis i puorejom lītom.”