Roksta autore: Vineta Vilcāne, portals lakuga.lv

Rudiņs Latgalīšu kulturys ziņu portalam lakuga.lv atguojs ar izmaiņom – nu 1. oktobra portals dorbojās viņ daleji, jo nav finansiejuma pylnvierteigys darbeibys nūdrūsynuošonai. Leidzekļu nav ari 2021. godam.

Portals lakuga.lv izveiduots 2007. godā, jau nu pošys pyrmuos dīnys tys roksta tikai latgalīšu rokstu volūdā, i da šam ir vīneigais medejs pasaulī, kura saturs ir tikai latgaliski. Itūs 13 godu laikā ar sovu darbeibu lakuga.lv ir pīruodejuse, ka latgalīšu volūdai ir sova vīta medejūs, Latvejis kulturtelpā i škārsteiklā. Latgalīšu kulturys ziņu portals lakuga.lv ir bejs kai sova veida Latgolys vizeitkarte, tam ari bejuse lela lūma latgalīšu volūdys saglobuošonys i atteisteišonys procesā.

Tymā pošā laikā itūs vysus godus portals ir ceinejīs par izdzeivuošonu, i lelā mārā tik ilgi ir pastuoviejs pasasokūt tuo redakcejis entuziasmam. Lakuga.lv eipašnīks, bīdreiba “Latgolys Studentu centrs”, regulari ir pīsadalejs dažaidūs projektu konkursūs, īgiustūt finansiejumu portala darbeibys nūdrūsynuošonai. Dimžāl pastuovūšuo kulturys/medeju finansiešonys politika ir ļuovuse īgiut finansiejumu viņ dažim mienešim, vysod turūt portala komandu nazinis i trauksmis stuovūklī – kas ar lakuga.lv nūtiks, kod beigsīs itys projekts, voi nuokoušajā leidzekļus daškiers? Atseviškūs projektu konkursūs ir tics daškierts dalejs finansiejums. Kasgods ir tykuši raksteiti vairuoki projektu dasacejumi, i finansiejums īgiuts nu dažaidu olūtu. Tys nikaidā veidā nav ļuovs ilgtermeņā plānuot lakuga.lv darbeibu, ari trauciejs portalam atsateisteit.

Nu 2020. gods 1. janvara leidz 30. apreļam lakuga.lv saturs tyka sagataveits par Vaļsts kulturkapitala fonda daškiertū finansiejumu, nu 1. maja leidz 30. septembram portala pamatsaturs topa ar Latgolys kulturys programys atbolstu. Ir īgiuts ari finansiejums Medeju atbolsta fondā, tok tys paredz atsevišķu rubriku izveidi saskaņā ar projekta dasacejumu, i nikaidā veidā lakuga.lv pamatsatura izveidi. Tyka snāgti vairuoki projekti, kab īgiutu leidzekļus lakuga.lv pamatdarbeibys nūdrūsynuošonai periodam piec 30. septembra, tok tī nagiva atbolstu. Tys nūzeimoj – ar 1. oktobri portals lakuga.lv ir puortraucs viesteit par latgaliskuos kulturys nūtikšonom Latvejā i pasaulī. Ir tics izdareits vyss īspiejamais, kab Latgalīšu kulturys ziņu portals pastuovātu, tok na vysod lobys i vajadzeigys iniciativys giust atbolstu.

Leidz goda beigu ik mienesi lakuga.lv varēs skaiteit viņ dažus rokstus, kas topuši ar Medeju atbolsta fonda finasiejumu, kai ari sadarbeibys partneru rokstus. Ar Vaļsts kulturkapitala fonda atbolstu tiks nūdrūsynuotys vairuoku latgalisku pasuokumu tīšraidis škārsteiklā. Nūtiks ari caturtais pasauļa diktats latgalīšu rokstu volūdā.

Itūšaļt nav nikaidys skaidreibys par Latgalīšu kulturys ziņu portala lakuga.lv pastuoviešonu 2021. godā. Ar nuokušu godu portalam vajadzeigs jauns redaktors – ar janvari puortraucu sovu dorbu lakuga.lv kai redaktore i projektu vadeituoja. Byut voi nabyut latgalīšu medejam, byus atkareigs nu tuo, voi kaids byus gotovs uzajimt vadeit lakuga.lv i raksteit projektu dasacejumus finansiejuma pīsaistei.

Paļdis kolegim, eipaši par jūs entuziasmu i nasavteigū dorbu, i sadarbeibys partnerim, kuri gon īsyuteja informaceju, gon atbaļsteja dažaidys lakuga.lv iniciativys. Paļdis ari uzticeigajim laseituojim.