Roksta autore: Vineta Vilcāne, portals lakuga.lv

Piec dažu nedeļu jau 13. reizi padūs Latgalīšu kulturys goda bolvu “Boņuks”. Muola statuetis par padareitū sajims 11 latgaliskuos kulturys aktivitatis, nūtikšonys, procesi i personeibys. Portals lakuga.lv vaicoj, kai bolvys asameiba ītekmiejuse Latvejis kulturvidi.

Latgalīšu kulturys goda bolvys “Boņuks” organizatora Latgolys viestnīceibys GORS vadeituoja Dināna Zirniņa par bolvys ītekmi iz Latvejis kulturvidi soka: “Latgalīšu kulturys goda bolva “Boņuks” ir veids, kai mums pošim apjaust, cik boguota ir latgaliskuo kultura, īdrūsynuot i byut lobā nūzeimē lapnim. Bolva itūgod tiks padūta jau 13. reizi i leidza ar tū uzskotam, ka itūs godu laikā par latgaliskū kulturu ir suokts dūmuot i saprast vaira kai par kusteibu, vasalu kulturys daļu, kurei ir tik dažaida. Sovulaik kotrys latgaliskais projekts, aktivitate vaira beja pats par sevi i raudzeja pīvērst uzmaneibu sev, tod niu “Boņuks” ir tys, kas paleidz izaceļt vysim kūpā – paruodūt, kas ir bejs lobs nūtics goda laikā, pīvieršūt vēļ uzmaneibu koč kam taidam, kū vysi ir pamanejuši kūpejā kulturys kontekstā, bet vēļ vaira – taidam, kū varbyut regiona voi vaļsts mārūgā cik daudzi i nav pamanejuši. “Boņuks” Latvejis kulturvidē paleidz veicynuot izpratni par varbyut cytaižuokom Latvejis kulturys aktivitatem, bet pošim latgaliskuos kulturys dareituojim īdūt kluotyn pošpuorlīceibu, ka tys, kū jī dora, ir svieteigs i svareigs dorbs ni tikai sovai vītejai kūpīnai, bet, ka var tai saceit, vysai latgaliskajai kulturai pasaulī, jo latgaliskais nav tikai regiona voi pat vaļsts rūbežūs.” D. Zirniņa ari pībylst, ka “Boņuks” nūteikti veicynoj kūpejū izpratni par latgaliskū kulturu Latvejā.

Kulturys ministra biroja vadeituoja Marika Zeimule atzeimoj, ka Latgalīšu kulturys goda bolva “Boņuks” ir unikals pasuokums Latvejis kulturvidē, sovukuort kulturai ir lela nūzeime regionalajā atteisteibā. “Svareigi, ka akcantāts cylvāku personeigais īguļdejums Latgolys kulturys dzeivis ilgtspiejis nūdrūsynuošonā. Kulturys ministreja nūviertej “Boņuku” kai lobu pīmāru regionaluos pošapzinis veicynuošonā, izceļūt Latgolai sovdabeigū, kas ir kūpeigs vysai Latvejai,” soka M. Zeimule.

Pa 13 bolvys pastuoviešonys godim muola Boņukus sajāmuši desmitem cylvāku, storp tūs ari Latgolys Regionaluo televizejis žurnaliste Ausma Sprukte. Ar Latgalīšū kulturys goda bolvu “Boņuks 2019” tyka nūvārtāts Ausmys kai žurnalistis veikums latgalīšu volūdys populariziešonā, i, kai atzeist bolvys sajiemieja, tys ir mudynuojs turpynuot īskuoktū.

“Bolvys sajimšona munu aktivitati latgaliskajā kulturā nūstyprynuoja. Deve pošpuorlīcynuoteibu i cīši motivēja īt i dareit tuoļuok, lyka saprast, ka latgalīšu volūdys izskaniešona i populariziešona televizejā, turkluot na viņ Latgolys regionā, a vysys vaļsts leiminī, ir kai sova veida miseja. Da tam beja reizis, kod lykuos, ka viņ pošai tys ir svareigi, a, sajamūt bolvu, sajutu ari sabīdreibys atbolstu, par kū asu cīši pateiceiga i laimeiga. Ir ari praktisks īgivums, ituo goda suokumā otkol ar “Re:TV” kanala producentim atsajaunuoja diskuseja par tū, voi dreikst ziņuos “stand up” jeb tekstu kamerys prīškā runuot latgaliski. Kai vīnu nu pamatuojumu, parkū es dreikstu i varu tai dareit, minieju ari “Boņuka” bolvys sajimšu taišņi par tū, ka  “Re:TV” i “LTV” ziņu sižetūs  izcieļu latgaliskū i tai motivieju tū dareit ari cytim” soka Ausma Sprukte.

Ari Oskaru Maculeviču, kopejis grauzdātovys “KUUP” eipašnīku, sajimtuo bolva ir motiviejuse naapsastuot pi īsuoktuo. Latgalīšū kulturys goda bolvu “Boņuks 2019” jis kūpā ar dzeivisbīdri sajēme par Latgolys i latgalīšu volūdys populariziešonu caur kopejis zeimynu.

“Bolvys sajimšona veicynuoja plošu atpazeistameibu i paaugstynuoja produkta vierteibu.Lai gon vysys idejis deļ īrūbežuojumu 2020. godā myusim naizadeve eistynuot, goda laikā asom radejuši div jaunus kopeja produktus – “’Pynaklu Jurs” i “Malnais Ontons”. Mes cīši cerim, ka ar sovu stuostu asom īdvesmuojuši latgalīšus radeit i atteisteit sovys idejis tepat sātā,” soka Oskars.

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.