Rokstu sagataveja: portals lakuga.lv

Žurejis dorbs pi Latgalīšu kulturys goda bolvys „Boņuks 2020“ pretendentu nūviertiešonys ir golā, i niu zynomi 30 bolvys nominanti par padareitū 2020. godā. Itūgod bolvys par aktivitatem, dorbu i sasnāgumim latgaliskajā kulturā tiks padūtys jau treispadsmytū reizi – 6. martā ceremonejā nu Latgolys viestnīceibys GORS, kas byus vārojama ari tīšraidē LTV1, tiks paziņuoti desmit bolvys „Boņuks 2020“ sajiemieji i gūdynuots ari bolvys „Par myuža īguļdejumu latgalīšu kulturys atteisteibā“ sajiemiejs.

Latgalīšu kulturys goda bolvys mierkis ir apkūpuot lobuokū, spylgtuokū i svareiguokū padareitū i nūtikšonys pārnejā godā latgaliskajā kulturā, gūdynuot aktivuokūs latgalīšu kulturys puorstuovus, popularizātuojus, kai ari veicynuot i rūsynuot jaunradis i kulturys daudzveideibys atsateisteišonu iz prīšku. „Boņuks 2020“ gūdynuos par sasnāgumim i padareitū 2020. godā. Bolvai tyka sajimtys vaira nikai 120 dasacejuma anketys kategorejuos „Volūda. Literatura. Publicitika“, „Audio. Video“ i „Aktivitatis. Nūtikšonys. Personeibys“, vysu bolvys pretendentu skaitam sasnādzūt 112 dažaidys nūtikšonys, personeibys, dorbus, projektus i cytys aktivitatis. Kai pretendentu vierteišonys kritereji tyka izvierzeiti pretendenta snāguma kvalitate, aktivitate vysa goda laikā, regionā, vaļstī voi plotuokā mārūgā raiseituo rezonaņse, latgaliskums i/voi Latgolys kulturys vierteibu nesšona, pretendenta pamastī pādi – ītekme iz latgaliskuos kulturys procesim iz prīšku.

Latgalīšu kulturys goda bolvys „Boņuks 2020” nominanti ir (alfabeta parādā):

1. Aldis Bukšs ar pyrmū romanu latgaliski „Bruoli”
2. Andryva Jūrdža 175. jubilejis goda aktivitatis
3. Bilingvalais dzejis kūpums „Pādejais modeļs”
4. Daina Kraukle ar gruomotu „Dienvidlatgalē austās segas”
5. Folklorys kūpa „Upīte” ar aktivitatem, albumu „Padzīdam i…” i videoklipim
6. Grupa „Dabasu Durovys” ar albumu „Perimetrs” i tuo prezentacejis koncertim
7. Grupa „Inde Indive” ar EP „Mater Omnium” i debejis albumu „II”
8. Grupa „Tautumeitas” ar albumu „Dziesmas no Aulejas” i koncertdarbeibu
9. Grupa „The Sound Poets” ar dzīsmi „Tik lānai kai munys dūmys”
10. Grupa „Varang Nord” ar dzīsmi „Svietneica”
11. Gustavs Manteifels „Poļu Inflantija (Inflanty Polskie)”
12. Izdavums „Muna dzīšmu gruomota”: notu gruomota, koncerts „Dzīšmu gruomota” i latgalīšu dzīšmu stuosti
13. Kina „Laiki. Cylvāki. Volūda”
14. Koncertizvadums „Latgolys freska”
15. Latgalīšu rakstnīceibai veļteitais raidīroksts „Puslopys”
16. Ligija Purinaša i Kaspars Strods „Laikmeta nospiedumi: 20. gs. Latgales stāsti”
17. Lipskis/Justs/Arbidāns ar albumu „Taids džezs”
18. „Ludzas igauņu ābece”. Sastateituojs Uldis Balodis
19. Muzykys i aiļu festivals „Upītes Uobeļduorzs” pyrmū reizi breivdobā
20. Ontona Kūkuoja 80. jubilejis goda nūtikšonys, gruomota „Mīlesteiba. Lelais Līpu kolns” i dzejis izruode „Pa mīlesteibu brīnūt, kuojis nasaļ”
21. Postfolklorys grupa „Rikši” ar koncertdarbeibu, albumu „trīp!” i videoklipim
22. Publiciste i latgalīšu volūdys entuziaste Vineta Vilcāne
23. Radejis raidejums „Pīci breinumi 2.0”
24. Raidejums „Latgales ciematu stāsti: nezināmais par zināmo”
25. Raidejums „Literatūre”: Anna Rancāne i Ontons Rupaiņs
26. Tradicionalūs saļmu i bēru dzīšmu kruojums „Saļmes Stērnīnē”
27. Youtube kanals „Im a’mazed”
28. ŪGA. Albums „LG ir HH”
29. Viesturnīks Kaspars Strods
30. Viesturs Kairišs i kina „Piļsāta pi upis”

Bolvys „Boņuks 2020“ žurejis komisejis viertejumus par pretendentim itūgod deve rekordlels žurejis komisejis lūcekļu skaits – 56 latgaliskuos kulturys puorzynuotuoji, īprīškejuo goda bolvu sajiemieji, medeju puorstuovi, bolvys reikuotuoju puorstuovi, latgaliskuos kulturys sabīdryskī aktivisti i attīceigūs sferu pīaicynuotī eksperti, kurūs kasdīna nav saisteita ar latgaliskū kulturu. Kategoreju „Volūda. Literatura. Publicistika“ vērtēja 19 žurejis lūcekli, „Audio. Video“ – 19 žurejis lūcekli i „Aktivitatis. Nūtikšonys. Personeibys“ – 32 žurejis lūcekli (vairuokim ekspertim beja juoizviertej vaira nikai vīna kategoreja). Ar pylnu žurejis komisejis sastuovu var īsapazeit Latgalīšu kulturys goda bolvys „Boņuks“ sātyslopā bonuks.lv. Žureja īsnāgtūs nominantus izviertej divejuos kuortuos – pyrmuo ir nakluotīnē, kod teik vārtāti vysi īsnāgtī pretendenti, bet ūtrei itūgod byus attuolynuotuo kuorta, kurā žurejis lūcekli diskutej i izviertej jau 30 nominantus. Ar „Boņuka“ muola statuetem teik gūdynuoti tī 10 pretendenti, kuri sajem vysa leluokū punktu saitu obejuos kuortuos. Bolvys „Par myuža īguļdejumu latgalīšu kulturys atteisteibā“ sajiemiejs publiski tiks paziņuots februara vydā.

Svineiguo bolvys padūšonys ceremoneja itūgod, īvārojūt pastuovušūs īrūbežuojumus, nūtiks Latgolys viestnīceibā GORS  tikai nakluotīnis formatā i sastdiņ, 6. martā (itūreiz atsakuopūt nu februara pādejuos svātdīnis tradicejis), kod ceremoneja tīšraidē pyrmū reizi byus skotoma LTV1 i portalā replay.lv. Ceremonejis vadeišona itūgod uzticāta komikim Juoņam Skuteļam, bet ar muzykalim prīšknasumim tymā prīcēs grupa „Tautumeitas“, grupa „Dabasu Durovys“, Kristīne Kārkle-Kalniņa, Edgars Kārklis, Marts Kristiāns Kalniņš i cyti. Latgalīšu kulturys goda bolva „Boņuks“ pyrmū reizi tyka padūta 2009. godā, bet nu 2013. goda bolvu reikoj Latgolys viestnīceibys GORS komanda, jau vairuokus godus sasadorbojūt ar bīdreibu „Partitūra“. Bolvys nūtikšonu atbolsta Valsts kulturkapitala fonds, Vaļsts kulturkapitala fonda Latgolys kulturys programa ar A/S „Latvijas valsts meži“ i Latgolys regiona atteisteibys agenturys atbolstu, kai ari Rēzeknis piļsātys dūme, Bolvu nūvoda, Leivuona nūvoda, Rēzeknis nūvoda i Viļānu nūvoda pošvaļdeibys, kai ari latgalīšu kulturys ziņu portals lakuga.lv.