Roksta autoris: Inga Vigule, Nautrānu sporta hallis – KN vadeituoja; Vineta Vilcāne

2020. godā beja Andryva Jūrdža 175. jubileja, tū sagaidūt, nūtyka daudzys i dažaidys aktivitatis.  Vierīneiguokais pasuokums beja 4. septembrī Rogovkā, pi kura dorbs suocēs jau marta mienesī, kod tyka raksteits Nautrānu pogosta puorvaļdis projekts “Andryvam Jūrdžam – 175” i planavuotys aktivitatis. Ar SIA “Latvijas Valsts meži” i Vaļsts kulturkapitala fonda 2020. gods Latgolys kulturys programys finansialu atbolstu tyka izveiduots Andryva Jūrdža 175. jubilejai veļteits pasuokums “Suprātka Kuorklinīkūs jeb Andryvam Jūrdžam 175”.

Uzvadumā pīsadaleja Nautrānu pogosta amatermuokslys kolektivi i školāni, jaunīšu rokgrupa “Vysu voi nadaudz” (vad. Ingars Gusāns), muziki Arņs Slobožanins, Vinsents Kūkojs i postfolklorys grupa “Rikši”. Koncertuzvaduma scenareja autore beja dzejneica Anna Rancāne, sovukuort režeju veiduoja Veronika Dundure i Ērika Bozoviča.

Koncertuzvadums suocēs ar šyupļadzīsmi “Leiču, leiču”, kurai izvālāts vaira nakai pyrma 100 godu A. Jūrdža pīraksteits dzejūļs, muzykys autors – Arņs Slobožanins. Dzīsmē skaņ na viņ juo, bet ari Ērika Zepa (postfolklorys grupa “Rikši”) i Juoņa Aišpura (grupa “The Sound Poets”) bolsi. Basgitaru īspieliejs Valdis Rundzāns (grupys “ELPA” i “Dabasu Durovys”), īrokstā dzieržama ASV dzeivojūšuos latgalītis Aijis Īzākys vejūļspēle, kai ari kūkle, kuru īspieliejs A. Jūrdža mozdāla mozdāls Pīters Aloizs Ragaušs.

Arņs speciali koncertuzvadumam Rogovkā radeja vēļ vīnu dzīsmi ar A. Jūrdža vuordim – “Vasareņa”. Jaunīšu rokgrupa “Vysu voi nadaudz” izpiļdeja dzīsmi “Veļtiejums Andryvam Jūrdžam”, kura ari topa eipaši itam pasuokumam. Dzīsmis vuordu autore ir Anna Rancāne, bet muzykys – grupys vadeituojs Ingars Gusāns.

Tai kai pasuokuma nūrisis laikā spākā beja kluotīnis apmaklātuoju skaita īrūbežuojumi, ar  Latvejis gūda konsula ASV i uzjiemieja Pītera Aloiza Ragauša atbolstu pasuokumu beja īspiejams vērtīs tīšraidi “Latgalīšu kulturys ziņu portals lakuga.lv” kontā Facebook, portals lakuga.lv beja ari pasuokuma informativais atbaļsteituojs.

Andryva Jūrdža atceris pasuokumā tyka prezentāta par jū saraksteituo gruomota, kas izdūta latgaliski i angliski. Tuos autors ir Andryva mozdāls Jōņs Cybuļskis. Gruomotys “Andryvs Jūrdžs” manuskripts daudzus godus globuojēs Latvejis Nacionalajā bibliotekā, tuo izdūšonu iniciieja i finansiali atbaļsteja Pīters Aloizs Ragaušs.

Ar Rēzeknis nūvoda pošvaļdeibys Kulturys nūdalis projektu konkursa “Radošo darbu konkurss” atbostu tyka realizāts Nautrānu pogosta puorvaļdis projekts “Viesture atskaņ šudiņ”, kuo rezultatā muokslineica Laima Andrejeva radeja divus sīnys gleznuojumus iz vacuo krūga ākys Rogovkys centrā. Vīns nu zeimiejumu ir veļteits Nautrānu pogosta personeibom, kurom 2020. gods beja jubilejis gods – Andryvam Jūrdžam, Pīteram Miglinīkam i Ontonam Kūkuojam.

Sajimtais “Boņuks” par Andryva Jūrdža jubilejis goda aktivitatem ir daudzu cylvāku nūpalns, kas ar sovu dorbu, entuziasmu i nasavteibu veicynuoja dzīsminīka i latgalīšu rūkroksta gruomatnīceibys puorstuova A. Jūrdža pīminis gūdynuošonu.