Vīna nu latgalīšu popularuokūs muzykys grupu “Bez PVN” 19. martā izdavuse nu jau trešū albumu ar nūsaukumu “Bezgaleibys”. Grybātuojim beja īspieja dasavīnuot grupys dalinīkim ari albuma atvieršonys svātkūs, kas nūsarysynuoja attuolynuotai, ar “Zoom” paleidzeibu.

Albumā “Bezgaleibys” kūpā ir 12 dzīsmis. Tī ir gon taidys, kas ir vairuok dzierdātys, gon ari taidys, kurys leidz šam satyktys tik koncertūs. Itymā albumā ir ari dzīsme “Stuovi”, kuru “Bez PVN” izveiduojuse kūpā ar apvīneibu “Latgalīšu Reps”.

Grupys puorstuovs Kristaps Rasims stuosta, ka dorbs pi “Bezgaleibom” ari licīs gondreiž voi bezgaleigs. “Albumam ir jau septeni godi ar asteiti, kai mes pi juo struodojom, ir daži teksti, kas vaira nikai pyrma desmit godu radeiti,” stuosta Kristaps. Rodūšais atbuma tapšonys process bejs cīši raibs.

Albuma nūsaukuma pamatā ir vuordu pretruna. Kristaps skaidroj, ka “vuords “bezgaleiba” piec sovys byuteibys ir vīnskaitlinīks, tei ir vīna. Kotrys cylvāks ir kai bezgaleiba”.

Albuma atvieršonys svātkūs, kuru atkuortuojumu vēļ niu var nūsavērt grupys “YouTube” kanalā, varēja na tikai sekuot leidza “Bez PVN” dalinīku sarunom i puordūmom par jaunū albumu, bet ari redzēt albuma tapšonys retrospekceju, kurā attāluoti grupys dalinīku pīdzeivuojumi i “Bezgaleibu” dzimšonys process.

Iz vaicuojumu, voi jau ir plani cytim abumim, Kristaps paruoda lelu kladi, kurā jaunys dzīsmis jau ir saraksteitys. Grupa struodoj iz prīšku.

Pi “Bezgaleibom” paraleli “Bez PVN” dalinīkim rūku dalyka ari Deniss Smirnovs, veiru kors “Graidi”, Uģis Vilcāns, Krišjānis Geidāns, Kaspars Ansons i Valmīrys Lomiks aba Ģirts Laumanis.

Albumu “Bezgaleibys” jau var nūsaklauseit dažaiduos muzykys straumiešonys vītnēs, tymā skaitā “Spotify” i “YouTube”, tok albumu taustamā aba CD formatā var pasyuteit taiseitslatgola.lv, kai ari Reigā i Rēzeknē nūpierkt kebabneicā “Ausmeņa Kebabs”.