Roksta autors: portals lakuga.lv

Suocam portala lakuga.lv pyrmūdīņu rubriku, kurā aicynuosim kaidu kulturys cylvāku īsaceit portala skaitetuojim treis kulturys lītys nedeļai. Itūreiz juos īsoka Jura Soikāna Ludzys muokslys školys direktore Sandra Vorkale.

Sandra treis kulturys lītys itai nedeļai nūsauc par lītom iz burta “p” – palaseit, patiemēt, pagaršuot. Jei paskaidroj: “Es tū vysu lobpruot doru!”

1. Palaseit: Andžāne, Lukaševičs i Skalbe.

Palaseit īsaceišu treis gruomotys dažaidim nūskaņuojumim, bet juos vysys ir dvēseli veļdzejūšys. Pajemit Marijis Andžānis tēlojumus “Izejas punkts”, Valentina Lukaševiča jaunū gruomotu “Pādi navā svāti” i Kārļa Skalbis “Kačeiša patmalis” Marutys Latkovskys puorlykumā.

2. Patiemēt: Cepleiši–Bieržgaļs–Rogovka–Odumova

Patiemēt byus pabyut dobā – īviļkt pylnu kryutežu pavasara gaisa, saklauseit putynus. Jemit mašynys ci lisapedus. Deļ mane cīši skaists maršruts ir Cepleiši–Bieržgaļs–Rogovka–Odumova. Cepleiši partū, ka tei ir muna dzymtuo vīta, bet Odumovys azars vysod ir breineigs. Ka ir draugi Rogovkā, ar jim runojūtīs, nūteikti pasaklausit, kai rogovkīši runoj i sirsneigi valk iz zūba – taids breineigs latgalīšu humors.

3. Pagaršuot: sylts styumīņs ar blyužgīni

Vēļ vīns “p” ir pagaršuot. Nazkod Rogovkā maņ pīduovuoja taidu interesantu iedīni – “sylts styumīņs ar blyužgīni”. Es, prūtams, nasaprotu, ka tuos ir meiceitys buļbis ar studini. Bet tik vīnreizieji tys skaņ!”