Rokstu sagataveja: portals lakuga.lv

Nūdybynuojums “Broņislavas Martuževas fonds Rakstītāja”  ir īceriejs pi Bronislavys Dzejis kliets Lubuonys nūvoda Indrānu pogosta “Dārziņos” veiduot ari Dzejis duorzu. Dzejneicys, dzīsmineicys i nacionalpatriotis sātys teritorejā byus tieļnīka Ģirta Burvja vairuoku monumentalu laukakmiņu kompoziceja. Vydzemis kulturys programai ir padūts projekts “Broņislavas Martuževas rakstu akmeņi. 1. posms”, kuru varams atbaļsteit ar bolsuojumu, informej fonda vadeituoja Anna Egliena.

Īsadvasmojūt nu pošys Bronislavys izsaceituos pamatidejis, tieļnīks Ģirts Burvis veiduos akmini “Loga/krusta akmens. Piemineklis Martuževu dzimtai” kompozicejā ar div sādakminim. Bronislava Martuževa 2006. gada julī izasaceja par tū, kas varātu raksturuot jūs saimi, tys ir īraksteits diktofonā: “Tī ir juobyun kūkam, kas aug nu vīnys saknis, bet ir div calmi, nūgrīzti tān. Pi tuo calma vīnā pusē stuov staraiņs (orklys) un vijūlis lūceņš. Bet tī ir juobyun lobam zeimietuojam, kas izmastu tū matu. Nu i tuoļuok iz calma – iz tuo vīna juobyun maizis kukuļam un pīna krūzei, iz ūtra vajag byut karaveira laiveņai, bet eistineibā atvārtai gruomotai un iz juos izsvīsta karaveira laiveņa.

Tei ir vysa myusu saime. Tys calms ir tāvs ar muoti; tys pīns un maize ir muosa Midīte, tys orklys un vijūlis lūceņš ir bruoli Cipris un Pīters; gruomota i karaveira laiveņa asam mes, mozī (Bronislava un bruoļs Henrihs).

Krysts – tai kai es tymā dzejūlī par Vosoryssvātkim asmu rakstejuse, ka “krusts stāv nogurušiem pieturēties, tā nasta šodien plecus nenospiež”. Maņ redzīs, ka tys krysts, kas byutu tī pīmineklī – tys byutu, pi kuo pīsaturēt mums vysim. Krysts ir nasts i iznasts. Un Dīvs ir vairāk ness kai asam nasuši mes – tū pošu myusu krystu. Cik labi byutu, ka mes, redz, taidā Vosoryssvātku nūskaņā varātu sasatikt ar Tāvu dabasūs.” Īceris tapšonā tiks īsaisteita sabīdreiba, sevkurs varēs īsasaisteit skiču projekta izstuodis izviertiešonā. Kinooperators i režisors Zigurds Vidiņš dokumentēs projekta eistynuošonys gaitu. Kotru godu paradzāts pīvīnuot pa jaunam akmiņa tālam. Atbaļsteit projektu varams, nūbolsojūt par tū ite.