Rokstu sagataveja: portals lakuga.lv

Itymā pavasarī izguojs unikals izdavums par tradicionalū dzīduošonu – Latvejis Kulturys akademejis tradicionaluos dzīduošonys grupa “Saucējas” izdavušys gruomotu i divejus CD, kas apvīnuoti izdavumā “Dabā”, viestej bīdreibys “Kultūras menedžmenta centrs “Lauska”” publicātuo informaceja.

Izdavums “Dabā” apkūpoj tradicionaluos dzīduošonys grupys “Saucējas” pīredzi unikalā projektā “Tradicionaluo dzīduošona dobys akustiskajā telpā”, kurā vydā asūšī tautysdzīšmu īskaņuojumi atkluoj dzīduošonu kai dzīduotuoju i dažaidu Latvejis dobys ainovu skanisku sasameišonu. “Saucējas” pi ituo izdavuma struoduojušys četrus godus i padareitais dorbs ir nav viņ diveji audio CD ar 60 dzīsmem nu vysu Latvejis nūvodu, nu ari gruomota ar rokstim par projekta laikā dabuotū pīredzi, kai ari grupys vadeituojis Ivetys Tālis pietejums par dobā dzīduošonys tradiceju atspīgeļuošonu tautysdzīsmēs.

“Saucējas” albuma dzīsmis īdzīduojušys dobā dažaiduos vītuos Latvejā – piļskolnā, mežā, pi azara, pļovā, pūrā, pogolmā pi guņkura, pi upis, atrūnūt 14 skaņvītys Modūnis nūvoda Ļaudūnys pogosta Sāvīnys piļskolnā, Solys nūvoda Rūžu pūrā, Amatys nūvoda “Ruķeļu” i “Lazdu” sātuos, kai ari pi Salacys upis natuoli nu Skaņuokolna Mozsalacys nūvodā. Dzīduošonu dobā sagiut grupai paleidzējuši skaņu inženeri Edmunds Racinskis i Gatis Gaujenieks. 23 nu vysu izdavuma 60 dzīšmu guojušys ari nu dažaidu Latgolys vītu – nu Aulejis, Upītis, Kuorsovys, Rekovys, Medņovys, Rudzātu, Vonogu, Škilbānu i ari Līpnys, dzīsmis sovulaik dzīduojušys taidys slovonys Latgolys dzīduotuojis kai Margarita Šakina, Anna Kaža, Domicella Līpeņa i cytys.

Grupys vadeituoja Iveta Tāle soka, ka projekta ideja nūbrīduse pakuopeniski – vairuoku godu garumā lauka pietejumūs izvaicuoti tradicionalī dzīduotuoji par jūs dzīduošonys pīredzi, īsapazeits ar tautysdzīsmem i dzīduošona ari periodiski praktizāta dobā. Tai uzkruotuos zynuošonys i pīredze ļuovuse sacynuot, ka dobai kai akustiskai telpai latvīšu dzīduošonys tradiceju kontekstā ir pamateiga nūzeime i eistynū prīškstotu par tū var dabuot viņ komunikacejā storp dzīduotuoju i dobys ainovu, kas itymā projektā bejs īspiejams, tolkā īmūt myusdīnu skaņu īrokstu variešonai.

Jaunū grupys “Saucējas” albumu “Dabā” var pasyuteit “Lauska” veikalā lauska.lv, kai ari varēs nūsaklauseit popularuokajuos muzykys straumiešonys vītnēs, bet poša grupa “Saucējas” cer, ka albuma attaiseišonys koncertūs varēs sasatikt jau itymā vosorā.