Rokstu sagataveja: portals lakuga.lv

Nacionaluo elektroniskūs plašsazinis leidzekļu padūme (NEPLP) konkursu rezultatā daškieruse finansiejumu 54 628,19 eiro pylsūniskuos leidzdaleibys, nacionaluos identitatis i kulturtelpys styprynuošonai veļteitu raidejumu veiduošonai Latgolys televizejuos i radejuos 2021. godā, viestej informaceja NEPLP sātyslopā.

“Ar itūs konkursu paleidzeibu gribim atteisteit pylsūniskū leidzdaleibu, veicynuot sabīdreibys salīdiešonu, kai ari styprynuot nacionalū identitati i kvalitativu informativū i kulturtelpu Latgolys regionā. Tamā storpā, styprynuot latvīšu, latgalīšu rokstu volūdys i Latgolys regionalūs i vītejūs medeju žurnalistikys kvalitati,” soka NEPLP prīšksādatuoja vītneica Aurēlija Ieva Druviete.

Konkursā par satura veiduošonu 2021. godā Latgolys regionalajuos i vītejuos televizejuos nu div dasaceitūs projektu sabīdryskuo pasyutejuma finansiejums 29 983,89 eiro daškierts SIA “Latgales reģionālā televīzija” raidejumam “Žik!”.

Sovutīs konkursā par satura veiduošonu 2021. godā Latgolys regionalajuos i vītejuos radejuos nu div dasaceitūs projektu sabīdryskuo pasyutejuma finansiejums 24 644,30 eiro daškierts SIA “Divu krastu radio” raidejumam “Pi myusu Latgolā”.

Konkursūs dasaceitī projekti tyka izvārtāti piec vairuokim kriterejim, tamā storpā, jūs atbiļsteiba konkursa mierķam, sabīdryskuo pasyutejuma aizdavumim, jūs aktualitate vaļsts, regiona ci vītejūs nūtikšonu kontekstā, projekta satura koncepcejis kvalitate i detalizacejis pakuope, kai ari raidejumu demo i satura izplateišona vysaiduos platformuos, socialajūs medejūs, auditorejis īsaiste, sasnādzamuos auditorejis lelums, finansialuo kapacitate i cyti.

Kūpumā konkursā beja daīmami 75 000 eiro, leidz ar tū par atlykušū summu tiks reikuots atkuortuots konkurss.