Rokstu sagataveja: portals lakuga.lv

Latvejis Nacionalais kulturys centrs (LNKC) izsludynuojs kasgadejū dasacejumu padūšonu Nacionalajam namaterialuo kulturys montuojuma (NKM) sarokstam. Iz prīšku itys process nūtiks elektroniski, dasokūt namaterialuo kulturys montuojuma vierteibys jaunajā škārsteikla vītnē nematerialakultura.lv. Dasacejumu padūšonys termeņš – ituo gods 15. juņs, viestej informaceja LNKC i NKM sātyslopuos.

“Itū vītni asam gaidejuši nu Nacionaluo namaterialuos kulturys montuojuma saroksta tapšonys suoku 2017. godā,” stuosta LNKC Namaterialuo kulturys montuojuma eksperte Gita Lancere. “Cīš nūpītnai struoduojom pi tuo, kab dasacejumu sagataveišonys i padūšonys process vītnē byutu saleidzynūši vīnkuoršs i tehniski skaidri strukturāts, kab dasaceituoji raksteišonys gaitā varātu ārtai sajimt ekspertu konsultaceju.”

Izsludynuota klauseituoju dasasaceišona diveju seminaru cyklam “Nemateriālā kultūras mantojuma ilgtspējības nodrošināšana – starptautiskie un nacionālie saraksti;  projektu rakstīšanas pieredze, prakse, idejas”, kas nūtiks ituogods 29. aprīlī i 7. majā tīšsaistē, platformā “Zoom”. Dasasaceišona seminarim elektroniski da 25. apreļa LNKC sātyslopā. 29. aprelī 10.00–14.00 stuņdēs tīšsaistis seminarā par lobū praksi NKM saglobuošonā i piecteceibys nūdrūsynuošonā, par sadarbeibu i jaunim izaicynuojumim seminarā stuosteis: UNESCO Latvejis Nacionaluos komisejis generalsekretare Baiba Moļņika i UNESCO Latvejis Nacionaluos komisejis konsultante Ieva Švarca, Latvejis Nacionaluo kulturys centra namaterialuo kulturys montuojuma eksperte Gita Lancere, bīdreibys “CultureLab” vadeituoja Ilona Asare i bīdreibys “Skaņumāja” vadeituoja Sandra Lipska. Seminarā 7. majā 10.00–14.10 eipaša viereiba tiks veļteita projektu raksteišonys praktiskajai pīredzei. Pīsadaleis: Latvejis Nacionaluo kulturys centra direktore Signe Pujāte, Siguldys nūvoda kulturys centra “Siguldas devons” vadeituoja Jolanta Borīte, Drabešu muižys Omotu sātys i Tradicionaluo kulturys iniciativu centra “KasTe” vadeituoja Inese Roze, folklorys zynuotneica, Tautys muzykantu bīdreibys vadeituoja Iveta Dukaļska.

Nacionalajā NKM sarokstā kasgods teik īkļauti elementi, kas NKM lykuma izpratnē ir vaļsts aizsorgojamys vierteibys. Jūs tikšonai sarokstā ir plašs attīceiguos kūpīnys atbolsts i leidzdaleiba. Pošlaik sarokstā īkļauti 24 elementi, nu jūs 8 vierteibys ir nu Latgolys: saļmu dzīduošona Zīmeļlatgolā (2017), dzīduošona pusbolsā (2017), Latgolys bubyna spēlis tradiceja (2017), saļmu dzīduošona Vabalis i Leiksnys pogostūs (2017), Upītis kulturtelpa (2018), maja dzīduošona pi krysta Dagdys nūvoda Ondrupinis i Škaunis pogostūs (2019), maja dzīduošona pi krysta Jaunovys Marijis gūdam Zīmeļlatgolā (2020), stykla pyušonys omota prasme Leivuonā (2020). Sarokstam padūtūs dasacejumus izviertej NKM padūme, pīaicynojūt ekspertus.

“Namaterialais kulturys montuojums ir zynuošonys, prasmis i paražys, kū nūdūdam nu paaudzis paaudzē, nu meistara muocekļam, tai saglobojūt iz prīšku. Itei iniciativa ir aktuala vysā pasaulī, partū ka myusdīnu globalizacejis laikā cylvākim ir svareigi saglobuot sovu identitati i pastreipuot sovys kulturys unikalitati,” soka G. Lancere.