Sagataveja: portals lakuga.lv

Daugovpiļs nūvoda Naujinis pogosta Slutišku sādžā tyvuokajā laikā taps staraveru kulturys montuojuma centrs i rodūšuos darbneicys. Dorbi pi tuo izveidis suokti, eistynojūt ERAF projektu “Rīteiropas vērtības”, informej Daugovpiļs nūvoda dūmis Informacejis i sabīdryskūs attīceibu dalis sabīdryskūs attīceibu specialiste Inese Minova.

Vysaidys īceris itymā projektā teik eistynuotys jau nu 2018. gods. Piec arhitektis Ģertrūdis Rasnačys byuvprojekta 2019. godā labīkuortuota atpyutys vīta “Latgales sēta”, byuvdorbus veice SIA “Latalus”. Savutīs piec arhitekta Dzintara Bernharda (SIA “A2C”) izstruoduotuo byuvprojekta nūdrūsynuota Markovys piļskolna aizsardzeiba i drūsa publiskuo daīmameiba. Byuvdorbus veice SIA “Smart Energy”.

Itūšaļt Slutišku sādžā ituo projekta aktivitatēs teik restaurātys div ākys, kas sovulaik budavuotys staraveru senejuos tradicejuos. Obejis guļbyuvis – dzeivojamuo ustoba i škiuņs – ir kulturys montuojuma objekti, kū pošvaļdeiba īsaguoduojuse sovā eipašumā ar mierki juos atjaunuot i saglobuot, kab sādžā izveiduotu staraveru kulturys montuojuma centru i rodūšuos darbneicys.

Restaurātajā lauku sātā “Slutišķi 2” tiks īreikuots vīnuots ekspozicejis komplekss “Vecticībnieku kultūras mantojuma centrs”. Vīnā nu āku byus daīmama informaceja par staraveru goreigū i materialū kulturu, tiks atjaunuots telpys interjers ar staraveru tradicionalū cepli, vysaidim sadzeivis i religiskuo kulta prīkšmatim. Savutīs ūtramā ākā izvītuotuos ekspozicejis mierkis byus paruodeit tautys kūka byuvnīceibys prasmis i īpazeistynuot ar Dīnvydlatgolys staraveru omota – gaļdnīka – prasmem, kai ari tradicionalū nūsadorbuošonu lauku sātā – lūpkūpeibu.

Ākuos pošlaik pabeigti vysi demontažys dorbi, nūteik konstrukceju atjaunuošona, gondreiž pabeigta jumta skaidu saguma izbyuve. Bejušajā dzeivojamā ustobā tiks atjaunuots puorts ar ščiteņu, maizis ceplis, tiks veikti elektromontažys dorbi, īreikuota guņsdzieseibys i apsardzis signalizaceja. Ir izbyuvāts arteziskais ūrbums i tiks labīkuortuota teritoreja. Saskaņā ar leigumu vysi byuvdorbi juopabeidz da juņa. Byuvprojektu izstruoduojuse SIA “Ināras Caunītes birojs”, byuvdorbus veic SIA “WARSS +”, a byuvuzraudzeibu – AS byuvuzjāmums “Restaurators”.

Projekta “Rīteiropas vērtības” vodūšais partners ir Daugovpiļs piļsātys dūme (projekta padeviejs) i sadarbeibys partneri – Daugovpiļs nūvoda dūme, Kruoslovys nūvoda dūme, Ludzys nūvoda pošvaļdeiba i Preiļu nūvoda dūme. Projekta mierkis ir saglobuot i atteisteit nūzeimeigu kulturys i dobys montuojumu Latgolā ar augstu simboliskū vierteibu i davumu vītejuos, nacionaluos i eiropeiskuos identitatis styprynuošonai, kai ari atteisteit ar tū saisteitūs pakolpuojumus ilgtspiejeigai ekonomiskuos izaugsmis veicynuošonai regionā. Kūpumā tiks atjaunuoti seši vaļsts nūzeimis kulturys pīminekli Latgolā. Kūpejuo leiguma summa 6 454 208 eiro, tymā skaitā ERAF leidzfinansiejums 4 695 000 eiro. Daugovpiļs nūvoda dūmis daļa projektā ir 500 000 eiro. Projekta eistynuošonys termeņš – 2022. gods 21. marts.