Kulturys īsacejumi nedeļai: džezs, “Pyrma syltī” i zaļumi iz palūdzis
Rokstu sagataveja: portals lakuga.lv
Ituos pyrmūdinis īsacejumim nedeļai ir rakstureigs mīrs i harmoneja, drupeit ari lauku dzeivis vāsmys. Itūņedeļ kū latgalisku pasaklauseit, paskaiteit i paraudzeit pīduovoj Latgalīšu kulturys ziņu portala žurnaliste Sintija Augustova
- Latgalīšu tautysdzīsmi džezā
Koč maņ jau ilguoku laiku ir patics džezs, saleidzynūši naseņ sev atkluoju taišni latgalīšu tautysdzīšmu apdaris džeza nūskaņuos “Trio Lipskis/Justs/Arbidāns” albumā “Taids Džezs”. Koč albumā ir viņ pīcys kompozicejis, tuos ir spieceigys i gona dažaidys, lai saklauseitu sev koč kū jaunu, interesnu i īprīšk nadzierdātu. Vaira informacejis par trio “Trio Lipskis/Justs/Arbidāns” albumu “Taids Džezs” ITE.
2. Puorskaiteit seņ naskaiteitū
Pyrmūdīnis saistuos ar jauna dorba cielīņa suokumu. Maņ dorba nedeļu vysulobuok paleidz īvadeit koč kuo seņ skaiteita puorskaiteišona, atsaukšona atmiņā. Itūņedeļ izvēle par lobu krytuse Oskara Orlova aba Raibuo stuostu gruomotai “Pyrma syltī”. Pyrmū reizi “Pyrma syltūs” skaiteju pyrma pīcu sešu godu, tok vēļ itūšaļt rūka snādzās plauktā taišni piec “Pyrma syltūs”. Vaira par gruomotu ITE.
3. Zaļums iz palūdzis
Tai kai leluokū daļu sovys bierneibys i jauneibys (cik nu varu atsaļaut runuot par jauneibys godim 22 godu vacumā) vosoruos i pavasarūs asu pavadejuse dzeraunē, duorzā ar vysaidim zaļumenim maņ apleik, tok itūšaļt, kod jau trešū pavasari pavodu, studejūt i ari struodojūt Reigā, maņ suoc tuos lauku idillis datryukt. Deļtam vīns nu munu ituos nedelis īsacejumu ir īreikuot kuknē iz palūdzis zaļumu duorzeņu, ka tys vēļ da šam nav izdareits. Šudiņ nu reita aizguoju apsavērt, kai jiutās lūceni i pētersili – jim augt Reigā iz palūdzis i gona labi pateik!
Veiksmeigu i produktivu itū nedeli!
