Sagataveja: portals lakuga.lv

Latgolys kongresa dīnys svieteišona ari itūgod paradzāta Latvejis Republikys Saeimā, kur trejuos stuņdēs piec pušdīņu byus svieneiga sēde Cylvāktīseibu i sabīdryskūs lītu komisejis Latgolys apakškomisejā. Kotrys grybātuojs sēdei varēs sekuot leidza tīšraidē Saeimys sātyslopā saeima.lv.

Sēdi vadeis Cylvāktīseibu i sabīdryskūs lītu komisejis Latgolys apakškomisejis prīšksādātuojs Edmunds Teirumnīks i apakškomisejis sekretare Janina Kurseite. Apakškomisejis deputatus attuolynuotai uzrunuos Saeimys prīšksādātuoja Ināra Mūrniece, Vaļsts prezidents Egils Levits, Ministru prezidenta parmalentaruo sekretare Evika Siliņa, izgleiteibys i zynuotnis ministre Ilga Šuplinska i Saeimys frakceju puorstuovi.

Taipat programā paradzāts ari Daugovpiļs Universitatis Humanitarūs i socialūs zynuotņu instituta regionalūs studeju centra “Latgales Pētniecības institūts” vadeituoja ir Dr. hist. Henrika Soma lekceja „Izgleiteiba Latgolā, viesturiskais redzīņs” i Rēzeknis Tehnologeju akademejis profesoris Dr. philol. Sanitys Martenys lekceja „Latgalīšu volūda digitalūs resursu i myusdīnu volūdu izgleiteibys koņtekstā”.

Svineiguos sēdis programa ITE.

27. apreļs ir viesturiskuo 1917. goda Latgolys latvīšu kongresa lāmumu pījimšonys datums. Kongresā pījimtī lāmumi veiduoja pamatu Latvejis vaļstij i Latvejis Satversmei. Latgolys kongresa dīna atzeimejamūs dīnu sarokstā tika īkļauta 2018. godā, kab caltu Latgolys latvīšu pošapziņu, styprynuotu regionalū identitati, izruodeitu cīnu viesturiskajajom ar vaļsts izaveiduošonu saisteitajom nūtikšonom, kai ari veicynuotu latgalīšu īsasaisteišonu pylsūniskajuos aktivitatēs. Pyrmū reizi Latgolys kongresa dīna tyka sveiteita 2019. goda 27. aprelī.