Roksta autors: portals lakuga.lv

Jau catūrtū godu Preiļu Muzykys i muokslys škola sadarbeibā ar Preiļu Viesturis i lītiškuos muokslys muzeju izsludynoj konkursu “Jāzepa Pīgožņa balva jauniešiem Latvijas ainavu glezniecībā”.

Konkursa mierkis ir rūsynuot interesi par Latvejis ainovu i juos daudzveideibu, saglobuot izcyluo Latvejis ainavista Jāzepa Pīgožņa pīmiņu, kūpt i popularizēt ainovys žanru gleznīceibā.

Sabīdreibā vairuok zyna konkursu “Jāzepa Pīgožņa balva Latvijas ainavu glezniecībā”, parkū tik leidzeigs nūsaukums? Jaunīšu konkursa iniciatore, Preiļu Muzykys i muokslys školys izgleiteibys programys “Vizuāli plastiskā māksla” vadeituoja Marianna Abricka par ideju soka tai: “Taišni partū izveiduojom itū konkursu, ka taids ir lelajim muokslinīkim. Maņ muokslys školā roduos dūma, ka kas taids varātu byut ari jaunīšim, lai jūs pīsaisteitu viesturiskajom saknem. Lai jī suoc aizdūmuot par tū i vāruot cytu dorbus, lai iz prīšku poši lelūs konkursā spiej pīsadaleit. Konkurss – tei ari ir pīredze, ka salīk dorbus kūpā i verās cytu radeitū. Kod Preiļūs pleneri tyka reikuoti, muokslys školys audzieknim ir bejuši pasuokumi kūpā ar lelajim muokslinīkim,  jī kūpā gleznuoja parkā i cytuos vītuos. Padūmuoju, parkū nasareikuot jaunīšu izstuodi.

Muzejs lobu pruotu atbaļsteja munu īruosynuojumu par itū konkursu. Pyrmūs konkursa godus reikuojom skaistu pasuokumu, iz kū sabrauce nu nūvodu školu. Pārņ, nasaverūt iz krīzis apstuoklim, taipat izstuožu zāle beja pylna ar dorbim. Sātā siediešona bārnim i jaunīšim roda zynomu pesimismu i apateju, ari muokslys školu bārnim vīnim pošim sātā gryuši īsadvasmuot. Sātā radūši var struoduot, kod ir stypra gryba. Bet maņ ir cereiba, ka dorbi byus.”

Konkurss paradzāts 14–20 godus vacim jaunīšim nu Latvejis muokslys školu, muokslys studeju voi cytu izgleiteibys, muokslys īstuožu. Dorbus konkursam juoīsyuta pa postu voi juoīsnādz personeigi Preiļu Muzykys i muokslys školā dorba dīnuos nu 2021. gods 20. augusta da 10. septembra. Vairuok informacejis par konkursu nūlykumā ITE.