Sagataveja: portals lakuga.lv

Nu 2021. goda 17. maja da 14. juņa Daugovpiļs piļsātys dūmis Kulturys puorvaļde organizej tīšsaistis apvuiceibu seminaru cyklu Latgolys kulturys īstuožu darbinīkim i rodūšūs industreju puorstuovim, viestej puorvaļdis publicātuo informaceja.

Seminaru cyklys “Komunikācija. Dizaina domāšana. Radošums. Sadarbība” paradzāts pīcūs apvuiceibu seminarūs, kurī byus pyrmūdīnem 17., 24., 31. majā i 7. i 14. junī desmit stuņdēs reita attuolynuoti ZOOM platformā. Tymūs profesionali i pīredziejuši specialisti stuosteis par taidom temom kai komunikaceja ar masu medejim, presis relizis, rodūšuos dūmuošonys prasmis i metodis, sabīdryskuos attīceibys socialajūs teiklūs i tūs efektiva izmontuošona, krizis komunikaceja, dizaina dūmuošonys metožu pīlītuošona, kulturys nūtikšonu komunikaceja, dorbs ar auditoreju i cytom temom.

Apvuiceibom pīsateikt aicynuoti Latgolys regiona kulturys centru, kulturizgleiteibys īstuožu, muzeju, biblioteku, rodūšūs industreju, kai ari navaļstiskūs i jaunīšu organizaceju puorstuovi. Pīsateikšona da 16. maja, aizpiļdūt pīsacejumi ITE. Vītu skaits īrūbežuots.

Dūma par itaida veida apvuiceibom rodusēs, jo itūgod nūteik dorbs pi Daugovpiļs piļsātys kulturys atteisteibys programys 2021.–2027. godam, kai ari tikū tyka gataveits pīsacejums Eiropys kulturys golvyspiļsātys konkursam, i asūt radzams, ka kulturys i rodūšuo sektora puorstuovim vajag styprynuot kapacitati i papyldynuot zynuošonys dažaiduos myusu dīnu aktualajuos sferuos. Leidza ar pyrmū itaidu seminaru cyklu Daugovpiļs Kulturys puorvaļde raudzeis īdybynuot jaunu tradiceju i regulari raudzeit sataiseit Daugovpiļs piļsātys i Latgolys regiona kulturys i rodūšuo sektora darbinīku apvuiceibys.

Ituo seminara nūtikšona teik eistynuota ar Latvejis vaļsts mežu i Vaļsts kulturkapitala fonda atbaļsteituos Latgolys kulturys programys 2021 paleigu.