Sagataveja: portals lakuga.lv

Tīslītu ministreja izsludynuojuse atkluotu konkursu iz Vaļsts volūdys centra Terminologejis i tīsteibu aktu tulkuošonys departamenta lingvista omotu, kuram pīsateikt aicynoj latgalīšu rokstu volūdys zynuotuoju, viestej informaceja Latvejis Republikys oficialajā izdavumā “Latvijas Vēstnesis”.

Jaunuo specialista dorba aizdavumi byus saisteiti ar latgalīšu rokstu volūdys konsultaceju dūšonu, Latgalīšu rokstu volūdys apakškomisejis dorba organiziešonu, kai ari vajadzēs izstruoduot metodiskus materialus par latgalīšu rokstu volūdys lītuošonu i tuos kvalitatis nūdrūsynuošonu. Pi praseibu pretendentim nūruodeita izgleiteiba filologejā, dorba pīredze ar lingvistiku, teicamys latgalīšu rokstu volūdys zynuošonys.

Lingvista, kurs specializātūs latgalīšu rokstu volūdā, poziceja ir Tīslītu ministrejis iniciativa i, kai skaidroj Vaļsts volūdys centra Terminologejis i tīseibu aktu tulkuošonys departamenta vadeituojs Arturs Krastiņš, tod ideja par specialista pīsaisteišonu latgalīšu rokstu volūdys normu atteisteišonai i izstruodei roduos, vārojūt latgalīšu rokstu volūdys situaceju i viertejūt veidus, kai styprynuot latgalīšu pīdereibys sajiutu Latgolai i reizē veicynuot latgalīšu rokstu volūdys atteisteibu. “Ideja par itaida specialista pīsaisteišonu roduos jau pyrma puora godu, bet lingvistu i volūdys politikys veiduotuoju vydā tei jo eipaši tyka aktuala pārnejā godā leidza ar jaunūs vaļsts volūdys politikys pamatpastatejumu izstuodis aizsuokšonu. Latgalīšu rokstu volūda ir byutiska latgalīšu identitatis apzinis daļa i naatjemama Latvejis kulturys vierteiba, deļtuo tuos styprynuošonai i atteisteišonai Latvejā paradzāti vairuoki pasuokumi dažaidūs volūdys politikys vierzīņūs i tī ir apraksteiti “Valsts valodas politikas pamatnostādnēs 2021.–2027. gadam”. Rokstu volūdys normu izstruode ir vīna nu latgalīšu kulturvidis kūpšonys i ilgtspiejis pastuoviešonys styurakmiņu, i tai reizē paleidz eistynuot ari puorejūs pamatpastatejumu pasuokumus, kas saisteiti ar latgalīšu rokstu volūdu i vaļsts volūdys politiku Latvejā kūpumā,” tai Krastiņš.

Taipat Krastiņš portalam lakuga.lv pastuosteja, ka Vaļsts volūdys centrys vaicuojums par latgalīšu rokstu volūdu sajem periodiski, bet, saleidzynojūt ar puorejūs vaicuojumu daudzumu, par latgaliskū raksteibu taidu ir rešuok. Jaunais specialists konsuļtēs īdzeivuotuojus pareizys latgalīšu rokstu volūdys lītuošonys vaicuojumūs i sagataveis atbiļdis iz īsnāgumim. Vaļsts volūdys centrā pošu reizi dorbojās Latvīšu volūdys ekspertu komisejis Latgalīšu rokstu volūdys apakškomiseja Latvejis Universitatis profesoris Annys Vulānis vadeibā, kas ir breivpruoteigs dorbs i komiseja da ituo saguoja, kod ir rysynomi kaidi aktuali vaicuojumi. “Lingvists dūs ari papyldu tehniskū i organizatoriskū atbolstu i popularizēs apakškomisejis lāmumus, publicejūt tūs Vaļsts volūdys centra škārsteiklā vītnē speciali latgalīšu rokstu volūdai veļteitā sadaļā, kai ari viesteis par tū plašsazinis leidzeklim,” stuosta Krastiņš.

Vaļsts volūdys centrā itys byus jauns omots, i dorbs ir iz nanūteiktu laiku. Olga par dorbu atbylstūši kandidata kategorejai teik sūleita nu 835 da 1190 eiro mienesī (bruto). Pīsateikt lingvista omotam var da 26. maja.

Vysa informaceja par omota konkursu ITE.