Rokstu sagataveja: portals lakuga.lv

Svātdiņ, 23. majā, septeņuos stuņdēs vokora “Fresh Terasē” Rēzeknē i jūs Facebook lopā byus pīdzeivojama nūtikšona “Čajs ar stuostu”, kurā tiks atkluoti četri Latgolys laukūs dzeivojūšūs sīvīšu pīredzis stuosti, kurūs vydā ari Annelis Slišānis stuosts, informej pasuokuma organizatoru puorstuove Amanda Anusāne.

Nūtikšonā “Čajs ar stuostu” mierkis ir aktualizēt sabīdreibā vys vēļ diskusejis raisūšūs vaicuojumus par latgalīti. Taipat myusdīnu pasaulī ir aktuals ari vaicuojums par dzymumu vīnleidzeibu. Latgolys lauku sīvīte itū vīnleidzeibu ir izjutuse vysa mozuok – īškeji trausla, uoreji stypra, styngra i reizē emocionala – taida asūt Latgolys sīvīte, kurai ir, kū saceit.

Vīna nu pasuokuma organizatoru, Amanda Anusāne, soka: “Voi dreikst runuot viņ slovoni ļauds? Nā, kotra cylvāka stuosts ir uzklauseišonys cīneigs i, vysā tycams, ka stypruoks par vysom teatra izruodem kūpā. Video stuostūs atkluosim, cik dažaidys ir i kai kūpumā veiduojušuos četrys Latgolys lauku sīvītis, kaidi veiksmis vieji i dzeivis pretvieji stuojas jūs ceļā. Sīvītem Latgolys laukūs ir, kū stuosteit. Juos runuos par pīklusynuotu suopi i atraiseitu prīcu.”

Četru stuostu varūnis ir tekstilmuokslineica Annele, pensionare Afanasija, ekosātys saimineica Inese i studente Brigita. Amanda portalam lakuga.lv atkluoj, ka sīvīšu izvēle beja gona ilgs i gryuts process. “Daudzi interesiejūs, skaiteju rokstus, bet golvonais atlasis pryncyps, kab tī byutu piec īspiejis dažaiduoki – vacuma kategorejuos, kab radzātu paaudžu atškireibys i tradiceju puormontuojameibu, ari dažaidys tauteibys i nūsadorbuošonys. Ceru, ka itam projektam iz prīšku byus ari turpynuojums, jo pošai beja cīši interesna i rodūšs process. Sovā ziņā ar itū gribīs “influeņcēt” ari tū vīnkuoršū, bet tik skaistū lauku dzeivisstylu.”

“Čajs ar stuostu” ideju rodusēs kai studeju dorbs, bet tuo aizsuokumi meklejami laikā, kod Amanda poša suokuse dokumeņtēt sovu babu i juos skatejumu iz dzeivi. Tai itei iņterese atsateistejuse plotuok. Nūsaukuma ideja aizgiuta nu leidzdaleibys metodis “Kafija ar politiķiem”, sev aizdūdūt vaicuojumu, ka sokamais i stuostamais nav viņ slovonim cylvākim, bet ari vīnkuoršajim.

Komanda, kas veidoj “Čajs ar stuostu”, ir četri Latvejis Kulturys koledžys studenti – poša idejis autore Amanda ir nu Rībeņu nūvoda, kai ari Jolanta Keiša nu Bolvu pusis, Emīls Kalenda nu Reigys i Ivo Čizauskis nu Zemgalis. Pi video taiseišonys tolkā guojuse ari Evita Broka, bet pošu 23. maja pasuokuma vokoru vadeis Vizma Mičule, kurei radzama ari “Čajs ar stuostu” dasacejuma video.

23. majā “Fresh Terase” apmaklātuoji i skateituoji Facebook varēs nūsavērt video stuostus, kuru varūnis teik aicynuotys iz sarunu pi čaja intervejis formatā, atbiļdūt iz dažaidim vaicuojumim par tū, kū jom nūzeimej byut sīvītei, par mīlesteibu pret Latgolu i laukim, tradiceju i zynuošonu puormontuošonu i nūdūšonu, kai ari par sovu kasdīnys dzeivi. Video stuostus papyldynuos grupys “Mākoņu maratons” muzykalī prīšknasumi.

Pyrma tīšsaistis nūtikšonys nu 17. da 23. maja interesentim tīpat “Fresh Terasē” (Atbreivuošonys alejā 142, Rēzeknē) ir vareiba izjimt kotra stuosta varūnei eipaši personalizātū čaju, kū kotrys pats var izgaršuot, verūtīs stuostus par sīvītem. Čaju saryupējuse zīddare Gita Ūsāne. Čajs ir bezmoksys, pajimšona nav juosaskaņoj, bet tuo skaits ir īrūbežuots.