Roksta autore: Sandra Ūdre, portals lakuga.lv

Ar taidu vaicuojumu sasaskar latgalīšu rokstu volūdys lītuotuoji salyktūs vītnīkvuordu, apstuokļa vuordu, saikļu i partikulu pareizraksteibā. Tok itamā vysā ir sova logika. Pīduovoju vīnkuoršus pareizraksteibys skaidrojumus. Jūs īvārojit, taisit špikerus i rokstit latgaliski pareizi!

1. Vuordu savīnuojumūs lītvuordus ar pylnom golūtnem roksta škierti, bezgolūtņu formys (tī jau ir apstuokļa vuordi) roksta kūpā:

tū godu, itū rudini, cytu nakti, iz reizis…

tūgod, itūrudiņ, cytunakt, izreiz…

2. Patstuoveigi vuordi sagloboj nūzeimi, jūs roksta škierti. Kūpā raksteitu vuordu savīnuojuma nūzeime naizrīt nu atsevišku vuordu:

Jis par tū zynuoja i partū gaideja.

Deļ tuo gadejuma jis turēja tū lelū maisu, deļtuo juo naizmontuoja cytur.

Īmu pa ceļu, kas naseņ savasts kuorteibā, paceli nu sovys sātys.

Nikas troks jau puorguojīnī nanūtyka, viņ leitā sausys napalyka ni drēbis, ni iedīņs.

3. Eisynuotū naz- roksta kūpā, a nazyn atdola:

nazkas, nazkaids, nazkaida, nazkurs, nazkura, nazkod, nazkur, nazcik..

nazyn kas, nazyn kaids, nazyn kaida, nazyn kurs, nazyn kura, nazyn kod, nazyn kur, nazyn cik…

4. Leidzeigi atdola cytus pylnu vuordu savīnuojumus:

kas naviņ, kaids naviņ, kaida naviņ, kurs naviņ, kura naviņ, kod naviņ, kur naviņ, cik naviņ;

kas nakas, kaids nakaids..

kas nabejs, kaids nabejs..

kod kas, kod kaids..

koč kas, koč kaids, koč kurs..

da kas, da kaids, da kaida..

vyss kas, ni deļ kuo ‘tāpat vien, bez iemesla’

5. Savīnuojumu, kū veidoj treis vuordi, pareizraksteiba juoīgaumej:

kazyn kas, kazyn kaids, kazyn kaida, kazyn kurs, kazyn kura, kazyn kod, kazyn kur, kazyn cik;

partū ka, deļtam ka, deļtuo ka, aiztam ka, aiztuo ka.