Sagataveja: portals lakuga.lv

Ar Nacionalūs elektroniskūs plašsazinis leidzekļu padūmis (NEPLP) atbolstu pi radejis klauseituoju atsagrīž radiožurnals “Pi myusu Latgolā”. Tys ir kasnedelis raidejums par Latgolys aktualitatem, kulturviesturiskuo montuojuma saglobuošonu, jaunumim sabīdryski politiskajā, kai ari uzjiemiejdarbeibys jūmā, informej “Divu krastu radio” puorstuove E. Greidāne.

Raidejuma mierkis ir nūdrūsynuot latgalīšu volūdys styprynuošonu i diskuseju par regionali i vaļstiski svareigim vaicuojumim, veicynuot Latgolys regiona īdzeivuotuoju i cytur Latvejā i uorzemēs dzeivojūšūs latgalīšu lokalpatriotismu, sabīdreibys salīdiešonu i kvalitativys informativuos i kulturtelpys styprynuošonu.

Itūgod projektam papyldus ir jauns izaicynuojums – analizēt Latgolys ekonomiskuos izaugsmis īspiejis pandemejis apstuokļūs. Izmontojūt konstruktivuos žurnalistikys pajiemīņus, raidejumu veiduotuoji dūsīs meklēt Latgolys regionam sarežgeitu vaicuojumu rysynuojumus, kai ari analizēs pošvaļdeibu vieliešonu iznuokumu, informēs par Viesturiskūs zemu lykuma īdzeivynuošonu i Administrativi teritorialuos reformys īspaidu.

“Divu krastu radio” pīduovuotais radiožurnals “Pi myusu Latgolā” sastuov nu diveju daļu – vīna par Latgolys regiona socialekonomiskajim vaicuojumim nūzeimeigom sabīdryski politiskom tēmom i kulturvidis saglobuošonu, bet ūtra – par aktualom kulturys nūtikšonom.

Kulturys nūtikšonu apskots dzieržams “Divu krastu radio”  eterā kotru catūrtdīni 16.30 stuņdēs ar atkuortuojumim pīktdīnēs pļkst. 8.30 i 12.30. Savutīs “Pi myusu Latgolā” raidejums skanēs pīktdīnēs 16.30 stuņdēs ar atkuortuojumim sastdīnēs 12.30 i svātdīnēs 16.00.

Raidejumi tiks puorraideiti ari  radioprogramuos  radejā  “Ef-Ei” i “Radio Marija Latvija”. Radejis raidejumi tiks arhivāti i atrūnami Rēzeknis, Daugovpiļs i Jākubpiļs škārsteikla ziņu portalūs, kai ari “Divu krastu radio” socialūs teiklu platformuos “Facebook” i “draugiem.lv”.