Rokstu sagataveja: portals lakuga.lv

Zynomi albumi, kas itūgod nomināti 2021. goda “Austras balvai” – Latvejis lobuokajam albumam. Nominantu vydā ari Latgolys reperis Ūgys albums “LG ir HH”.

Ūgys, eistajā vuordā Daigys Barkānis, albums “LG ir HH” ir reperis debejis albums, tymā ir 11 kompozicejis.

Itys gods Ūgai ir bejs bolvom boguots – martā Daiga ar albumu “LG ir HH” tykuse gon pi “Boņuka”, gon ari pi muzykys īrokstu goda bolvys “Zelta Mikrofons 2021” kategorejā “Debija”. Vaira par Ūgys debejis albumu var skaiteit ITE.

“Šudiņ sajiemu zvonu, ka asmu nomināta. Itei ziņa uzlobuoja munu dīnu! Koč voi asu tikai nomināta, ir teišom miļzeigs gondarejums ar sovu byut storp tik kvalitativim albumim. Prīca i puorsteigums, i satraukums – vyss vīnā kerzē stuov iz golda. Es nu molys verūs, i navaru beigt prīcuotīs, par sova radeituo gora dorba nastajim auglim!” par nominaceju “Austras balvai” prīcojās Daiga.

Nominantu storpā ir ari grupa “Židrūns”, kurys albumā “Kovārņu mazbērniem” ir vīna dzīsme latgaliski – “Ai Jezu”. Nūsaukuma angliskuo verseja – “A girl scattering golden candies in Viļaka” (Meitine Viļakā buorsta zalta kampetys). Dzīsmis teksta autors ir dzejnīks Raibīs aba Oskars Orlovs, par dzīsmis pamatu izalaseits dzejūļs “Ap reitu” nu kruojuma “Pistacejis”.

“Austras balva” ir latvīšu muzykys īrokstu bolva, kū padūd Latvejis lobuokajam goda albumam.

Itūgod “Austras balvu” padūs jau sastū reizi. “Austras balvu” papyldynuos ari portala “Delfi”  reikuotais auditorejis bolsuojums, kurā portala apmaklātuojim byus īspieja izalaseit sovu favoritu nominantu storpā, reizi dīnā nūbolsojūt par meiluokū albumu. Bolsuojuma uzvarātuojam tiks “Delfi” simpateju bolva, kas ļaus eistynuot reklamys kampaņu portalā 1000 eiro apmārā.