Izdūts 26. literaturys almanahs “Olūts”
Roksta autore: Sandra Ūdre, portals lakuga.lv
Latgolys Kulturys centra izdevnīceibā 1. junī, kas ir gruomotu apguoda 31 goda dzimšonys dīna, izguojs 26. literaturys almanahs “Olūts”. Ituogods laidīnī skaiteituojim dzejis tekstus pīduovoj Oskars Seiksts, Voldemārs Voguls, Leontīne Apšeniece, Romons Spaitāns, Jūlijs Trōps, Ernests Vilcāns, Evelīna Visocka, Helēna Kulincāne, Imants Zeltiņš, Rūdolfs Linužs, Magdalena Vjatere. Sovutīs Jōņs Blaževičs, Aija Mikele-Strušele, Ilze Keiša, Iveta Dimzule, Kristīne Gļauda, Pīters Meikstums, Leonards Rakickis i jau pīmynātuo M. Vjatere puorstuov eisprozys žanru, a vīneigais lugu raksteituojs ir Andris Pelšs.
Bez tuo jaunajā “Olūta” laidīnī ir veļtejuma roksts ituogods dzejnīkim jubilarim Eduardam Krustānam, Tomasam Selickam, Izidoram Kundzēšam, Jōņam Karūdznīkam (e. V. Eugenijs Ruško), vēļ Ivara Vīka i Paula Jureviča kulturfilozofisku rokstu puorpubliciejumi latgaliski, ari izdevnīceibys gruomotu bibliografeja par 2020. gods II pusi i 2021. gods I pusi.
Kūpejuo almanaha nūskaņa – smuordeiga i kruosaina kai Latgolys doba vysūs godalaikūs, ar vysur i vīgli kluotasūšu mīlesteibu, kai pīmāram, V. Vogula dzejis ailēs: “Kafeja šudiņ gorda./ Varbyut tamdēļ,/ Ka blokus tu.” O. Seiksta filozofiskuos ailis gon līk atsaguoduot, ka ir ‘Covid-19’, a varbyut kaidys dziļuokys atsajiegšonys, krīzis laiks, pīmāram, saprūti, ka “var pat sleikdams naatguoduot maut” i “svātais un volkota/ taidūs pat kokorūs”.
Saimis attīceibu i sīvītis ar bārnim psihologiskuos, fiziskuos naizsoguoteibys sarežgeitūs pavedīņus stuostā “Aneite” škatynoj A. Mikele-Strušele. Kab kotrys itaids pīraksteitais stuosts, lyktu koč vīnai taidu problemu muoktai sīvītei atjēgt, puormeit dzeivi i saknē vaira napīļaut seve nacīneiga veirīša (ar vysom juo muotis problemom) sūpluok, jau byutu daudz. Partū skaitit itū i puorejūs tekstus, dūmojit leidza!
Literaturys almanaha izdūšona suocēs vuocu okupacejis laikā – 1943. i 1944. godā V. Luoča izdevnīceibā izguoja pyrmī seši “Olūta” numeri. Septeitais numers izguoja jau trymdā – Rītumvuocejā – 1947. godā. Piec Latvejis naatkareibys atgiušonys, suocūt ar 1992. godu, “Olūtu” izdūd Latgolys Kulturys centra izdevnīceiba.
