Sagataveja: Ilze Sperga i portals lakuga.lv

Itys ir mygluoja dzejis pyrmpubliciejums portalā lakuga.lv Par itim dzejūlim autors soka: “Ceļš iz augšu na vysod ir linears. Itys ir stuosts par īšonu nu tuo, kas izaver piec bezcereigys bedris, iz drupeit augšuoku punktu, kur drupeit atsapyust, pareflektēt i atrast spākus ruopuot tuoļuok uorā.” Sarunu ar autoru skaitit ITE.

*
*
*

flirts ar nūlemteibu
nazkur industrialajā rajonā
augstuokuo lobuma bedris
dūmys nu aizpārnejuo maja
izlītuos oleja kruosys
tod aizslauceis drupeit palākuma
koč autors pazuds bez viests
koč glaznu puorjēme nūlemteiba

*
*
*

kai izaraut nu palākuma
kod tys ir skapa videjais
dabasi kuru dīnu jau palāki
i nu rūku nav izlaista
palākuma
gruomota

***

rūžu duorzs sasola
zīma atīt
tovi muokūni ir aizguojuši
puor munim dabasim otkon zvaigznis speid
i jaunys durovys
       taisās
                valī

***

es apglobuošu sovu tīksmi piec teve
lai kaids arheologs jū atrūn
piec godu symta ci tyukstūšys
bet ka maņ pasaveiks
mes aizīsim kūpā iz kopu
izraksim aizmierstū grobu
i īsēsim sāklys nu saveitušu puču

muna melanholeja puorplyust
jei ītak spanī
ar kuru es laistu dīniškū buļbi
kas stateita rūžu duorza vītā

***

svātuokuos tacenis seņ jau nūbrugātys
vakar guoju pa celi ar
ar bādom aizsystu muti
viejā gaist vuordi
bolsa saitis paralizej mīgs
juo tryukums skaitoms
bezsapynu naktīs
naoriginaluos metaforuos
muokuļu postā bez adresatu

rokstu myglai
kurā izškeist piec dīniškuo puorguojīņa
jei atrass
saprass
pats golvanais
nikod prūjom napagaiss

***

soltuma apkūstys
satrunejušys lopys
sasaveidamys ar
mienešnīka palnu gaismu
īsagrīze
ītyna myglys sagā
šudiņ asmu nu cukra
škeistu iudinī
i
pagaistu

***

ar dzaltonu Ecolainu
brauču iz Reigu
sasatikt ar vīntuleibu
personeigi

***

Tu atguoji kai glikozis šots
lai pa ceļam iz sātu
es izavamtu
      munam tukšumam tys beja par soldonu
Augši lidojūt
ir īsasuocs gods
Tān kreitu
lejā sleidu
Tu paleidzi
cereibys gaismeni speidynūt
kai osnys
iz augšu
es deigstu

ceru ka saīs
izdzeivuot

*
*
*

conversi daleip
da līpu lopu lipeiguo aspaļta
juos nalaiž mani prūm
i es poša nagrybu aizbraukt

maiseņūs sabuozti līpu zīdi
gaida
lidūstys darbinīku švuorbeigūs skatīņus
i krateišonūs čemodanā par puspasauļa
kod nedeļom ilgi vīneigais mīrynuojums byus piparmātru čajs
koč muote nav vēļ
atsyutejuse madu