Sagataveja: portals lakuga.lv

Itūnedeļ īkreit suopeigs datums Latvejis viesturē – pyrma 80 godu, 1941. gods naktī nu 13. iz 14. juni, tyukstūšom okupātuos Latvejis īdzeivuotuoju tyka aizturāti i lūpu vagonūs izvasti iz NKVD koncentracejis nūmetnem voi myuža nūmatynuojumu attuolūs PSRS apvydūs. Iz itūs atmiņu notys nedelis kulturys aktualitatis īsoka Preiļu Viesturis i lītiškuos muokslys muzeja direktore Tekla Bekeša. Jei pīduovoj 1941. gods deportacejom veļteitū vidis izstuodi i izdavumu, ari jaunim prīškmatim papyldynuotū ekspoziceju par preilīšu liktinim II pasauļa karā.

Izstuode “Tūkstoš atmiņu sirdī dzeļ”

Nu ituogods 14. juņa da augusta Preiļu Viesturis i lītiškuos muokslys muzejs aycynoj apmeklēt 1941. gods deportacejom veļteitu vidis izstuodi “Tūkstoš atmiņu sirdī dzeļ”. Tys ir stuosts par Preiļu nūvoda izsyuteitajom personom leidz liktineigajam 14. juņam, par dzeivi i dorbu izsyutejumā, par atsagrīzšonu sātā. Izstuode apsaverama Preiļūs, Raiņa bulvarī 28 (īpretim kulturys nomam).

Izdavums “Tūkstoš atmiņu sirdī dzeļ”

Kotru godu Preiļu Viesturis i lītiškuos muokslys muzejs sovus apmaklātuojus prīcej ar jaunu izdavumu. Itūgod muzeja suvenirs “Tūkstoš atmiņu sirdī dzeļ” veļteits 1941. gods deportacejom i izdūts ar Latgolys regiona atteisteibys agenturys finansialu atbolstu. Bukletā deportātūs stuosti, atminis i fotografejis, kai aiī aizdavumi i lopys pīzeimem. Par izdavumu interesētīs Preiļu Viesturis i lītiškuos muokslys muzejā, Preiļu Golvonajā bibliotekā, Preiļu Turisma informacejis centrā.

Ekspoziceja “Muzeja stāsti Latvijai”

Myusu muzejs gaida apmaklātuojus ekspozicejā “Muzeja stāsti Latvijai”, kura niule papyldynuota ar jaunim i interesantim prīkšmatim par Preiļu nūvoda īdzeivuotuoju liktinim II pasauļa karā.